आयपीएल २०२५ स्पर्धेत मोठे बदल पाहायला मिळू शकतात. या स्पर्धेपूर्वी खेळाडूंचा लिलाव होणार आहे. या लिलावात रिटेन केलेल्या खेळाडूंना वगळता इतर सर्व खेळाडूंना रिलीज केलं जाणार आहे.

त्यामुळे उर्वरित सर्व खेळाडू लिलावाच्या रिंगणात असणार आहेत. दरम्यान काही भारतीय खेळाडू असे आहेत, जे या लिलावात महागडे ठरू शकतात. फ्रेंचायझी या खेळाडूंवर मोठी बोली लावू शकतात. कोण आहेत ते खेळाडू? जाणून घ्या.

माध्यमातील वृत्तात असं म्हटलं जात आहे की, रोहित शर्मा आणि केएल राहुलसारखे स्टार खेळाडू आपल्या संघाची साथ सोडू शकतात. असे झाल्यास हे खेळाडू देखील लिलावाच्या रिंगणात दिसतील.

केएल राहुल

केएल राहुलकडे लखनऊ सुपर जायंट्स संघाचं कर्णधारपद सोपवण्यात आलं होतं. त्याने या संघाचं नेतृत्व करताना आपल्या संघाला सलग २ वेळेस प्लेऑफमध्ये पोहोचवलं होतं. आयपीएल २०२४ स्पर्धेतही या संघाला प्लेऑफमध्ये जाण्याची संधी होती.

मात्र शेवटी या संघाला पराभवाचा सामना करावा लागला. त्यामुळे लखनऊ सुपर जायंट्स संघ त्याला रिटेन करण्याची शक्यता खूप कमी असणार आहे. जर त्याला रिलीज केलं आणि तो लिलावात आला तर नक्कीच तो महागडा खेळाडू ठरू शकतो.

रोहित शर्मा

रोहित शर्माच्या नेतृत्वाखाली खेळताना मुंबई इंडियन्सने ५ वेळेस आयपीएलची ट्रॉफी उंचावली. मात्र गेल्या हंगामात मुंबई इंडियन्सने त्याला कर्णधारपदावरून काढून टाकण्याचा निर्णय घेण्यात आला. त्यानंतर फलंदाज म्हणूनही त्याने चांगली कामगिरी केली. त्याने १४ सामन्यांमध्ये ४१७ धावा केल्या. मात्र माध्यमातील वृत्तात असा दावा केला जात आहे की,रोहित शर्मा आगामी हंगामात मुंबई इंडियन्स संघाची साथ सोडू शकतो.

हर्षित राणा

हर्षित राणाने कोलकाता नाईट रायडर्स संघाला आयपीएल २०२४ स्पर्धेचं जेतेपद जिंकून देण्यात मोलाची भूमिका बजावली होती. त्याने या संघाकडून खेळताना १९ गडी बाद केले होते. यासह फायनलमध्येही त्याने महत्वाची भूमिका बजावली होती. त्यामुळे तो जर लिलावात आला, तर नक्कीच त्याच्यावर मोठी बोली लागू शकते.