IPL 2025 चा दुसरा क्वालिफायर सामना मुंबई इंडियन्स आणि पंजाब किंग्स यांच्यामध्ये रंगणार आहे. अहमदाबादमधील नरेंद्र मोदी स्टेडियमवर हा सामना खेळला जाणार आहे. फायनलमध्ये जाण्यासाठी क्वालिफायर २ सामना जिंकणे आवश्यक आहे. आजचा (१ जून) सामना जिंकून फायनलमध्ये कोणता संघ जाईल याकडे सर्वांचे लक्ष लागले आहे.

अहमदाबादच्या नरेंद्र मोदी स्टेडियमवर आयपीएल २०२५ मधील क्वालिफायर २ आणि फायनल असे दोन सामने खेळले जाणार आहे. आकडेवारीनुसार, या मैदानावर टॉस जिंकणाऱ्या संघाचे वर्चस्व पाहायला मिळाले आहे. त्यातही टॉस जिंकून प्रथम फलंदाजी करणारा संघ विजयी ठरला आहे. सातपैकी सहा सामन्यांमध्ये ज्या संघाने प्रथम फलंदाजी केली, त्यांचा विजय झाला आहे. तेव्हा टॉस जिंकण्याचा (आणि प्रथम फलंदाजी करण्याचा) दोन्ही संघांचा प्रयत्न असेल.

खेळपट्टी आणि हवामानाचा अहवाल

आयपीएल २०२५ मध्ये नरेंद्र मोदी स्टेडियममध्ये झालेल्या सामन्यांमध्ये संघांनी मोठी धावसंख्या केल्याचे पाहायला मिळाले आहे. मैदानाची खेळपट्टी ही फलंदाजी करण्यासाठी अनुकूल आहे. अहमदाबादमध्ये स्वच्छ वातावरण असेल, संध्याकाळी तापमान २८ डिग्री सेल्सियरच्या जवळपास असेल, हवेत आर्द्रतेचे प्रमाण ५० ते ६५ टक्के राहील असा अंदाज हवामान खात्याने केला आहे.

मुंबई इंडियन्स आणि पंजाब किंग्स हा सामना जर पावसामुळे किंवा अन्य कारणांमुळे रद्द झाला, तर मुंबईच्या संघाचे आव्हान संपुष्टात येईल. आयपीएलच्या नियमांनुसार, क्वालिफायर २ सामन्यादरम्यान पाऊस पडला आणि सामना रद्द झाल्यास पॉईंट्स टेबलवर खालच्या क्रमावर असणारा संघ बाद होईल. पंजाब सध्या टेबल टॉपर्स आहेत. त्यामुळे सामना रद्द झाल्यास पंजाब किंग्सचा संघ फायनलमध्ये जाईल.