आयपीएल २०२५ स्पर्धेचा लिलाव येत्या २४-२५ नोव्हेंबरला सौदी अरेबियातील जेह्हादमध्ये होणार आहे. या लिलावापूर्वी सर्व संघांनी आपल्या रिटेन केलेल्या खेळाडूंची यादी जाहीर केली आहे. १० खेळाडूंना कोट्यावधी रुपये देऊन रिटेन करण्यात आलं आहे.

तर १५०० हून अधिक खेळाडूंनी लिलावासाठी आपलं नाव नोंदवलं आहे. यापैकी २०४ खेळाडूंवर बोली लावली जाणार आहे. लिलावात बोली लागणाऱ्या खेळाडूंपेक्षा अन्सोल्ड राहणाऱ्या खेळाडूंची संख्या अधिक असणार आहे. दरम्यान काही असेही खेळाडू आहेत, जे गेल्या हंगामात महागडे खेळाडू ठरले होते. मात्र आगामी हंगामात अन्सोल्ड होऊ शकतात.

१. स्पेंसर जॉन्सन -

स्पेंसर जॉन्सन हा गेल्या हंगामात गुजरात टायटन्सकडून खेळताना दिसून आला होता. या हंगामात खेळताना ४ गडी बाद केले होते. त्याचा या वर्षातील रेकॉर्ड पाहिला, तर त्याला ५ सामन्यांमध्ये केवळ ६ गडी बाद करता आले आहेत. गेल्या हंगामात त्याला १० कोटी रुपये मिळाले होते. मात्र या हंगामात सोल्ड होणंही कठीण आहे.

२. राइली रुसो

गेल्या हंगामात पंजाब किंग्जने राइली रुसोला ८ कोटी रुपये देऊन आपल्या संघात स्थान दिलं होतं. आपल्या टी-२० कारकिर्दीत त्याने ९००० हून अधिक धावा केल्या आहेत. मात्र त्याला गेल्या हंगामात आपली छाप सोडता आली नाही. त्यामुळे पंजाबने त्याला रिलीज करण्याचा निर्णय घेतला आहे.

३. झाय रिचर्डसन-

आयपीएल २०२४ स्पर्धेत दिल्ली कॅपिटल्सने झाय रिचर्डसनला ५ कोटी रुपये देत आपल्या संघात स्थान दिलं होतं. मात्र गेल्या हंगामात त्याला केवळ १ सामना खेळण्याची संधी मिळाली. त्यानंतर दुखापतीमुळे त्याला मैदानात उतरता आलं नाही. तो ऑस्ट्रेलियातील बिग बॅश लीग खेळतो. ऑस्ट्रेलियात खेळताना त्याचा रेकॉर्ड दमदार आहे. मात्र भारतातील खेळपट्टीवर त्याला आपली छाप सोडता आलेली नाही. त्यामुळे आगामी हंगामात त्याच्यावर बोली लागण्याची शक्यता खूप कमी आहे.

४. डेव्हिड विली

आयपीएल २०२४ स्पर्धेत डेव्हिड विली लखनऊ सुपर जायंट्स संघाकडून खेळणार होता. मात्र काही कारणास्तव त्याने आपलं नाव मागे घेतलं होतं. गेल्या हंमामात त्याच्यावर २ कोटी रुपयांची बोली लागली होती. मात्र या हंमामात त्याच्यावर बोली लागण्याची शक्यता खूप कमी आहे.

५. अल्जारी जोसेफ

वेस्टइंडीजचा वेगवान गोलंदाज अल्जारी जोसेफला गेल्या हंगामात रॉयल चॅलेंजर्स बंगळुरुने ११.५० कोटींची बोली लावत आपल्या संघात स्थान दिलं होतं. मात्र त्याला केवळ ३ सामने खेळण्याची संधी मिळाली होती. या ३ सामन्यांमध्ये त्याला केवळ १ गडी बाद करता आला होता. सातत्याने फ्लॉप कामगिरी आणि दुखापतग्रस्त असल्यामुळे कुठलाही संघ त्याच्यावर बोली लावण्याची शक्यता खूप कमी आहे.