दिल्लीतील अरुण जेटली स्टेडियम या घरच्या मैदानावर दिल्ली कॅपिटल्सला दारुण पराभवाला सामोरं जावं लागलं. सनरायझर्स हैदराबादने स्फोटक फलंदाजी करत २६७ धावांचा डोंगर उभारला होता, तो सर करताना दिल्लीच्या फलंदाजांनी अक्षरश: गुडघे टेकले आणि केवळ सर्वबाद १९९ धावांपर्यंत मजल मारता आली. हैदराबादचा ६८ धावांनी दणदणीत विजय मिळवला.

सनरायझर्स हैदराबाद, स्फोटक फलंदाजी आणि मोठ्या धावसंख्येचा ट्रेंड आयपीएल 2024 मध्ये सुरू आहे. पॅट कमिन्सच्या नेतृत्वाखाली या संघाची विजयी मालिका सुरूच आहे. आयपीएलच्या विक्रमी धावसंख्येच्या आधारे मुंबई इंडियन्स आणि रॉयल चॅलेंजर्स बंगळुरूला पराभूत करणाऱ्या सनरायझर्सने दिल्ली कॅपिटल्सवर विरुद्धही मोठी कामगिरी केली आणि सीझनमधील चौथा विजय नोंदवला.

आयपीएलच्या गेल्या 16 सीझनमध्ये स्फोटक फलंदाजी अनेकदा पाहायला मिळाली आहे. ख्रिस गेल, एबी डिव्हिलियर्स, ब्रेंडन मॅक्युलम सारखे अनेक फलंदाज आहेत, ज्यांनी गोलंदाजांना झोडपून काढलं आहे, परंतु ट्रॅव्हिस हेड आणि अभिषेक शर्मा यांनी आज स्फोटक फलंदाजीचा कहर केला.

दिल्लीनेही सुरुवातीपासून जोरदार प्रत्युत्तर दिलं होतं. पहिल्या षटकात सलग 4 चौकार मारून सुरुवात केली. पृथ्वी शॉने वॉशिंग्टन सुंदरला लक्ष्य केले पण त्याने ५व्या चेंडूवर त्याची विकेट दिली. डेव्हिड वॉर्नरचे खराब पुनरागमन झाले आणि तो स्वस्तात बाद झाला. पण युवा फलंदाज जेक फ्रेझर मॅकगर्कने तिसऱ्या षटकात सुंदरवर 3 चौकार आणि 3 षटकार मारत 30 धावा केल्या. त्यानंतर त्याने मयंक मार्कंडेला सलग 3 षटकार ठोकले आणि अवघ्या 15 चेंडूत अर्धशतक केले, जे या मोसमातील सर्वात वेगवान अर्धशतक ठरले.