आयपीएल २०२४ च्या ५३ व्या सामन्यात चेन्नई सुपर किंग्सने पंजाब किंग्सला त्यांच्या घरच्या मैदानावर पराभूत केलं. ऋतुराज गायकवाडच्या नेतृत्वाखाली खेळणाऱ्या सीएसकेने यंदाच्या मोसमातील हा सहावा विजय मिळवलाय.

या विजयासह सीएसकेने पॉईंट्स टेबलमध्ये भरारी घेतली असून टॉप-३ मध्ये पोहोचलाय. सीएसकेने नाणेफेक गमावली होती, पण पंजाबने त्यांना प्रथम फलंदाजी करण्याचे आमंत्रण दिलं. चेन्नईच्या संघाने २० षटकात ९ गडी गमावून १६७ धावा करत पंजाबसमोर १६८ धावांचे आव्हान ठेवलं.

या लक्ष्याचा पाठलाग करताना पंजाब किंग्सच्या फलंदाजांची खराब कामगिरी झाली. २० षटक खेळल्यानंतर पंजाबने संघाला ९ विकेट्सवर केवळ १३९ धावा केल्या. पंजाबला पराभूत करत चेन्नईने १२ गुण मिळवत पॉईट्स टेबलमध्ये ३ स्थान गाठलंय. तर चेन्नईकडू मिळालेल्या पराभवामुळे पंजाब संघाच्या प्लेऑफमध्ये जाण्याच्या आशा संपुष्टात आल्यात. पंजाब किंग्सचा या हंगामातील हा ७ वा पराभव आहे. पंजाब संघ ८ गुणांसह पॉईंट्स टेबलमध्ये ८ व्या स्थानावर आहे.

सीएसकेच्या विजयात रविंद्र जडेजाने महत्त्वाची भूमिका बजावली. या सामन्यात रविंद्र जडेजाने अष्टपैलू कामगिरी केली. जडेजाने प्रथम फलंदाजी करताना चेन्नईच्या संघाला कठीण परिस्थितीतून बाहेर काढत सन्मानजनक धावसंख्येवर नेलं. जडेजाने २६ चेंडूत २ षटकार आणि ३ चौकारांच्या मदतीने ४३ धावांची खेळी केली. यानंतर गोलंदाजी करताना त्याने पंजाब किंग्सची फलंदाजी उद्ध्वस्त केली. जडेजाने ४ षटकांत अतिशय किफायतशीर गोलंदाजी केली. केवळ २८ धावा देत ३ महत्त्वाचे बळी घेतले.

चेन्नईच्या संघाने दिलेल्या लक्ष्याचा पाठलाग करताना पंजाब किंग्सचे फलंदाज फ्लॉप ठरले. जॉनी बेअरस्टो (७धावा) आणि रिले रौसो (० धावा) एकापाठोपाठ एक बाद झाल्याने पंजाबचा डाव सुरुवातीलाच खिळखिळा झाला होता. प्रभासिमरन आणि शशांकने पंजाबचा डाव सांभाळला, पण संघाने ६२ धावा केल्या असताना शशांक २७ धावा करून बाद झाला. यानंतर विकेट्सची घसरगुंडी सुरू झाली. अवघ्या १०० धावांच्या आतच संघाने आपले ७ फलंदाज गमावलेत. सीएसकेकडून गोलंदाजी करताना जडेजा व्यतिरिक्त सिमरजित सिंग आणि तुषार देशपांडे यांनी प्रत्येकी २ बळी घेतले. मिचेल सँटनर आणि शार्दुल ठाकूर यांना १-१ विकेट मिळाली.