IPL 2023 Auction Latest : इंडियन प्रीमिअर लीग २०२३ च्या महापर्वासाठी कोच्चीमध्ये मिनी ऑक्शन सुरू होत आहे. या ऑक्शनमध्ये सर्व फ्रेंचाइजी संघ आपल्या आवडत्या खेळाडूंवर मोठी बोली लावणार आहेत. या लिलावाआधी एक मोठी बातमी समोर आली आहे. या वृत्तानंतर फ्रेंचाइजी खूपच अॅलर्ट राहून या संपूर्ण प्रक्रियेत सहभाग घेणार आहे. बीसीसीआयकडून पाच भारतीय खेळाडूंची नावं देण्यात आली आहे, ज्यांच्यावर बंदी घातली जाऊ शकते.

क्रिकबझच्या एका रिपोर्टनुसार, बीसीसीआयनं (BCCI) आयपीएलच्या सर्व फ्रेंचाइजी संघांना एक मेल पाठवला आहे. त्यात एकूण पाच खेळाडूंची नावं आहेत. त्यांच्यावर बीसीसीआयकडून बंदी घातली जाऊ शकते. यामुळे हे पाच खेळाडू कोण अशी चर्चा सुरू झाली आहे. (IPL 2023)

बीसीसीआयनं हा मोठा निर्णय घेतला आहे. मुंबईचा फिरकीपटू तनुश कोटियन याचं नाव असल्याचं सांगण्यात येत आहे. त्यानं स्थानिक क्रिकेटमध्ये चांगली कामगिरी केली आहे. अलीकडेच झालेल्या रणजी सामन्यात त्यानं हैदराबादविरुद्ध सात विकेट घेतल्या होत्या. (Cricket News)

याशिवाय, केरळचा रोहन, विदर्भातील अपूर्व वानखेडे, गुजरातचा चिराग गांधी आणि महाराष्ट्राच्या रामकृष्णन घोष यांचा या यादीत समावेश आहे. ज्यांच्या अॅक्शनविषयी साशंकता आहे. बीसीसीआयकडून चौकशी प्रक्रिया पूर्ण झाल्यानंतरच याविषयी निर्णय घेता येणार आहे. चौकशीत अॅक्शनमध्ये काही चुकीचं आढळून आल्यास त्यांच्यावर बंदी घातली जाऊ शकते.

गोलंदाजी शैली संशयास्पद आढळल्यानंतर जगभरातील अनेक खेळाडूंवर बंदी घालण्यात आली आहे. कोलकाता नाइटरायडर्सचा प्रमुख गोलंदाज सुनील नरेन याच्या गोलंदाजी शैलीवरही प्रश्नचिन्ह उपस्थित केले गेले. त्याने प्रत्येकवेळी गोलंदाजी शैलीत सुधारणा करून पुनरागमन केलं. अरमान जाफर, कर्नाटकचा मनीष पांडे, बंगालचा चटर्जी, महाराष्ट्राचा अजीम काझी यांना गोलंदाजी करण्यावर बंदी घालण्यात आली आहे.