मुंबई इंडियन्सचा कर्णधार रोहित शर्मा (Rohit Sharma) आणि प्लेइंग इलेव्हनच्या इतर सदस्यांना इंडियन प्रीमियर लीगमधील पंजाब किंग्जविरुद्धच्या सामन्यात स्लो ओव्हर रेटसाठी दंड ठोठावण्यात आला आहे. काल झालेल्या सामन्यात पंजाब किंग्जने 12 धावांनी सामना जिंकला. आयपीएलने एका निवेदनात म्हटले आहे की, “13 एप्रिल रोजी पुण्यातील एमसीए स्टेडियमवर पंजाब किंग्ज विरुद्धच्या आयपीएल सामन्यादरम्यान मुंबई इंडियन्सला (Mumbai Indians) स्लो ओव्हर रेटसाठी दंड ठोठावण्यात आला आहे.

मुंबईच्या संघाने पाच सामने गमावल्यानंतर मुंबईचे चाहते नाराजा आहेत. रोहित शर्माच्या नेतृत्वात खेळणाऱ्या संघाला आपला खेळ दाखवता आलेला नाही. त्यामुळे प्लेऑफमध्ये मुंबई जाणार की त्या अगोदरच बाहेर पडणार असा प्रश्न निर्माण झाला आहे.

पाचवेळच्या चॅम्पियन मुंबई इंडियन्सने पराभवाची मालिका सुरुच आहे. पंजाब किंग्जविरुद्ध त्यांचा सलग पाचवा पराभव झाला. त्यानुसार, "आयपीएलच्या किमान ओव्हर-रेटच्या उल्लंघनाअंतर्गत संघाची या हंगामातील ही दुसरी घटना आहे. मुंबई इंडियन्सचा कर्णधार रोहित शर्माला 24 लाख रुपये तर प्लेइंग इलेव्हनच्या इतर सदस्यांना 6 लाख रुपये किंवा त्यांच्या मॅच फीच्या 25 टक्के दंड ठोठावण्यात आला आहे," असे निवेदनात म्हटले आहे. यापूर्वी रोहितला दिल्ली कॅपिटल्सविरुद्धच्या सामन्यात स्लो ओव्हर रेटसाठी 12 लाखांचा दंड ठोठावण्यात आला होता.

Edited By: Pravin Dhamale