भारतीय फुटबॉलपटू रविंद्र सिंह याचं अचानक निधन झालं आहे. त्याच्या निधनाच्या या घटनेमुळे भारतीय फुटबॉल विश्वाला मोठा धक्का बसलाय. पंजाबमधील नवांशहर जिल्ह्यातील बछौरा गावात रविंद्र सिंह एका फुटबॉल स्पर्धेत खेळत होता. सामना सुरू असताना त्याला अचानक छातीत तीव्र वेदना जाणवू लागल्या. या वेदनांनी तो मैदानावर कोसळला.

तातडीने रूग्णालयात केलं दाखल

सहकारी खेळाडूंनी तात्काळ त्याला जवळच्या खासगी रुग्णालयात नेलं. मात्र रुग्णालयात पोहोचताच डॉक्टरांनी त्यांना मृत घोषित केलं. मिळालेल्या माहितीनुसार, रविंद्र सिंह याचा मृत्यू हार्ट अटॅकने मृत्यू झाल्याची शक्यता व्यक्त केली जातेय. तरीही त्याच्या मृत्यूचं नेमकं कारण वैद्यकीय तपासणीनंतरच स्पष्ट होणार आहे.

कोण होते रविंद्र सिंह?

रविंद्र सिंह हे पंजाबमधील लुधियाना जिल्ह्यातील मजरी गावात राहणारे होते. तो इंडियन फुटबॉल लीगमध्ये खेळणाऱ्या नामधारी एफसी या क्लबशी करारबद्ध होता. अवघ्या वयाच्या २५ व्या त्याच्या निधनाने सर्वजण हळहळले. मैदानावर तो डिफेंडरच्या भूमिकेत खेळत होता. एफसीच्या डिफेंडरमध्ये तो एक महत्त्वाचा खेळाडू मानला जात होता.

हिंदुस्तान टाइम्सच्या माहितीनुसार, रविंद्र सिंह हा गढशंकर इथल्या बब्बर अकाली मेमोरियल खालसा कॉलेजमध्ये बीएचे शिक्षण घेत होता. ते सध्या बीएच्या दुसऱ्या वर्षात शिकत असल्याची माहिती आहे.

क्लबकडून वाहिली श्रद्धांजली

रविंद्र सिंहच्या निधनानंतर त्याच्या क्लब एफसीने सोशल मीडियावर एक व्हिडिओ शेअर करून शोक व्यक्त केलाय. त्या पोस्टमध्ये लिहिलं होतं, 'आमचा फुटबॉलपटू रविंद्र सिंह याचं इतक्या कमी वयात अचानक निधन झाल्याची बातमी देताना आम्हाला अत्यंत दुःख होतंय. त्यांचं असं अकाली जाणं हे फुटबॉल विश्वासाठी मोठी हानी आहे. देव त्यांच्या आत्म्यास शांती देवो. या कठीण काळात त्यांच्या कुटुंबीयांना आणि प्रियजनांना धैर्य आणि शक्ती मिळो.'

या घटनेनंतर इंडियन फुटबॉल लीगने पुढील फेरीतील सर्व सामन्यांपूर्वी रविंद्र सिंहच्या स्मरणार्थ एक मिनिट मौन पाळण्यात येणार असल्याची, अशी घोषणा केली आहे. तसंच त्याच्या निधनानंतर बेंगळुरू एफसी, मिनर्वा एफसी आणि गोकुलम केरळ या क्लबांनीही शोक व्यक्त केला आहे.