Rishabh Pant: भारतीय क्रिकेट संघाचा धडाकेबाज फलंदाज रिषभ पंतच्या भीषण अपघाताने क्रिडाविश्वात खळबळ माजली होती. शुक्रवार( ३०, डिसेंबर) दिल्लीहून डेहराडूनकडे जात असताना हा भीषण अपघात झाला होता. अपघातामध्ये पंत गंभीर जखमी झाला असून त्याच्यावर रुग्णालयात उपचार सुरू आहेत.

रिषभला काही दिवसांपूर्वीच त्याला मुंबईत आणण्यात आले होते. तसेच मुंबईच्या कोकीलाबेन रुग्णालयात त्याच्यावर शस्त्रक्रियाही करण्यात आली होती. अपघातानंतर तब्बल १७ दिवसांनी रिषभ पंतने सोशल मीडियावर त्याचे पहिले ट्विट केले आहे. (Rishabh Pant)

याबद्दल अधिक माहिती अशी की, भारतीय क्रिकेटपटू रिषभ पंतने अपघातानंतर पहिले ट्विट केले आहे. या ट्विटमध्ये त्याने त्याच्या चाहत्यांचे तसेच बीसीसीआयचेही आभार मानले आहेत.

काय म्हणाला रिषभ पंत:

"तुम्ही दिलेल्या शुभेच्छा आणि पाठिंब्यासाठी मी कृतज्ञ आहे. मला तुम्हाला सांगायला आनंद वाटतोय की माझी शस्त्रक्रिया यशस्वी झाली आहे. आता यातून सावरण्याचा कालावधी सुरू झाला आहे. मी पुढील आव्हानांसाठी सज्ज आहे. बीसीसीआय (BCCI), जय शाह आणि सरकारी अधिकाऱ्यांना अविश्वसनीय पाठिंब्याबद्दल धन्यवाद."

दरम्यान, या गंभीर अपघातात रिषभ पंतच्या पायाला तसेच डोक्याला गंभीर दुखापत झाली होती. रस्त्यावरील खड्ड्यामुळे हा अपघात झाल्याचा खुलासा त्याने केला होता. रिषभ पंतच्या अपघातानंतर त्याच्या चाहत्यांसह संपूर्ण क्रिडा जगतात त्याच्या प्रकृतीबद्दल चिंता व्यक्त केली जात होती.

अपघातानंतर डॉक्टरांनी दिलेल्या माहितीनुसार, त्याला सहा ते सात आठवडे आराम करण्याची आवश्यकता आहे. त्यामुळेच त्याला आगामी विश्वचषकालाही मुकावे लागणार आहे.