Ind Vs NZ ODI Series: भारत आणि न्यूझीलंड यांच्यातील दुसरा एकदिवसीय सामना नुकताच पार पडला. या सामन्यात भारतीय संघाने दणदणीत विजय मिळवत मालिका खिशात घातली.  सामन्यात भारतीय गोलंदाजांची कमाल पाहायला मिळाली. त्यामुळेच न्यूझीलंडचा संघ १०८ धावांत तंबूत परतला.

या सामन्यात भारतीय संघाने ८ गडी राखून दणदणीत विजय मिळवला. मायदेशात भारतीय संघाचा (Team India) हा सलग सातवा मालिका विजय ठरला. भारतीय संघाचा हा जबरदस्त फरफॉरमन्सने सगळीकडून कौतुक होत असतानाच एका बॉलरने मात्र विराटचे टेंन्शन वाढवले आहे.

भारतीय क्रिकेट संघाचा धडाकेबाज फलंदाज रनमशिन विराट कोहली पुन्हा त्याच्या जुन्या फॉर्ममध्ये परतला आहे. विराटने वर्षाच्या सुरुवातीलाच श्रीलंकेविरुद्ध दोन शानदार शतके झळकावली. मागच्या तीन वर्षांपासून विराटची बॅट थंडावली होती. ती आता पुन्हा जबरदस्त फॉर्ममध्ये आली आहे.

परंतु स्पिनर्सविरुद्ध मात्र विराटची बॅट थंडावताना दिसत आहे. या समस्येवर त्याला अजून म्हणावी तशी मात करता आलेली नाही. खासकरुन डावखुऱ्या स्पिनर्ससमोर त्याची कमजोरी उघड दिसत आहे. त्यांच्यासमोर अजूनही विराटच फार काही चालत नाही. न्यूझीलंडविरुद्ध पहिल्या दोन्ही वनडे सामन्यात तो स्पिन बॉलिंगसमोर फेल ठरला.

काय आहे विराटची कमजोरी...

हैदराबादमधील पहिल्या सामन्यात टीम इंडियाची पहिली बॅटिंग होती. रोहित आणि शुभमन गिलने संघाला जोरदार सुरूवातही करुन दिली. यावेळी विराटकडे मोठी खेळी करण्याची संधी होती, मात्र न्यूझीलंडचा डावखुरा स्पिनर मिचेल सँटनर गोलंदाजीला आला.

त्याने स्टम्पच्या लाइनवर फुल लेंथ चेंडू टाकला. कोहलीने (Virat Kohli) चेंडू फ्रंट फुटवर येऊन खेळायला पाहिजे होता. पण त्याने बॅकफुटवर जाऊन डिफेंड केलं. कोहली चेंडूची लाइन चुकला आणि बोल्ड झाला. कोहलीने त्या मॅचमध्ये फक्त 8 रन्स केल्या.

दुसऱ्या सामन्यातही गमावली विकेट...

शनिवारी झालेल्या दुसऱ्या सामन्यातही विराटची अशीच गोची झालेली पाहायला मिळाली. या सामन्यातही विराट पुन्हा एकदा सँटनरच्याच बॉलिंगवर आऊट झाला. यावेळी सँटनरे ऑफ स्टम्पच्या बाहेर कमालीचा चेंडू टाकला. हा फुल लेंथ चेंडू नव्हता. कोहलीने फ्रंट फुटवर येऊन ड्राइव्ह मारण्याचा प्रयत्न केला. पण तो चुकला. लॅथमने कुठलीही चूक न करता, कोहलीच स्टम्पिंग केलं.