भारत आणि बांगलादेश यांच्यातील दुसऱ्या कसोटी सामन्याचा थरार कानपूरमध्ये सुरु आहे. या सामन्यात भारतीय संघाने नाणेफेक जिंकून प्रथम गोलंदाजी करण्याचा निर्णय घेतला. दरम्यान या सामन्यात पावसाची इनकमिंग आणि आऊट गोइंग सुरु असल्याने सामन्यातील पहिला दिवस ३५ षटकात संपला आहे. प्रथम फलंदाजी करत असलेल्या बांगलादेश संघाने आतापर्यंत ३ गडी बाद १०७ धावा केल्या आहेत.

या सामन्याबद्दल बोलायचं झालं, तर भारताचा कर्णधार रोहित शर्माने या सामन्यात नाणेफेक जिंकला आणि प्रथम गोलंदाजी करण्याचा निर्णय घेतला. हा धाडसी निर्णय घेणारा रोहित शर्मा पहिलाच कर्णधार ठरला आहे. १९६४ नंतर पहिल्यांदाच कुठल्या कर्णधाराने कानपूरच्या मैदानावर नाणेफेक जिंकल्यानंतर प्रथम गोलंदाजीचा निर्णय घेतला आहे. प्रथम फलंदाजीसाठी आलेल्या बांगलादेश संघाला आकाश दीपने सुरुवातीलाच २ मोठे धक्के दिले.

सलामीला फलंदाजीसाठी आलेला जाकीर हसन खाते ही न उघडता माघारी परतला. त्यानंतर शदनम इस्लाम २४ धावा करत माघारी परतला. या दोन्ही फलंदाजांना आकाश दीपने बाद करत माघारी धाडलं. त्यानंतर कर्णधार नजमुल हुसेन शांतोने बांगलादेशचा डाव सांभाळला. त्याने ३१ धावांची खेळी केली. मात्र आर अश्विनने त्याच्या या खेळीला ब्रेक लावला. शांतो ३१ धावा करत माघारी परतला. तर मोमिनूल हक ४० धावांवर आणि मुश्फिकुर रहिम ६ धावांवर नाबाद आहे.

भारतीय गोलंदाजांबद्दल बोलायचं झालं, तर रोहितने आतापर्यंत ४ गोलंदाजांचा वापर केला आहे. त्याने जसप्रीत बुमराह, मोहम्मद सिराज, आर अश्विन आणि आकाश दीपला गोलंदाजीची संधी दिली. यादरम्यान भारताकडून आकाश दीपने २ आणि आर अश्विनने १ गडी बाद केला.

या सामन्यासाठी अशी आहे दोन्ही संघांची प्लेइंग ११:

यशस्वी जयस्वाल, रोहित शर्मा (कर्णधार), शुभमन गिल, विराट कोहली, रिषभ पंत (यष्टीरक्षक), केएल राहुल, रविंद्र जडेजा, आर अश्विन, आकाश दीप, जसप्रीत बुमराह, मोहम्मद सिराज.

बांगलादेश प्लेइंग ११: शादमान इस्लाम, जाकिर हसन, नजमुल हुसेन शान्तो (कर्णधार), मोमिनुल हक, मुश्फिकुर रहीम, शाकिब अल हसन, लिटन दास (यष्टीरक्षक), मेहदी हसन मिराज, तेजुल इस्लाम, हसन महमूद, खालिद अहमद.