अंडर १९ महिला वर्ल्डकप स्पर्धेत भारतीय संघाची दमदार कामगिरी सुरुच आहे. भारताचा सामना स्कॉटलंडविरुद्ध पार पडला. या सामन्यात भारतीय महिला संघाने प्रथम फलंदाजी करताना २०८ धावांचा डोंगर उभारला होता.

या धावांचा पाठलाग करताना स्कॉटलँडचा डाव अवघ्या ५८ धावांवर आटोपला. भारतीय संघाकडून खेळताना तृषाने शानदार खेळी केली. तृषाने रेकॉर्डब्रेकिंग शतकी खेळी केली. तर कमलिनीने अर्धशतकी खेळी करत संघाची धावसंख्या १०० पार पोहोचवली.

भारतीय संघ या सामन्यात प्रथम फलंदाजी करण्यासाठी मैदानात उतरला होता. भारतीय संघाने २० षटकअखेर २०८ धावांचा डोंगर उभारला. भारताकडून खेळताना युवा फलंदाज तृषाने ५९ चेंडूंचा सामना करत १३ चौकार आणि ४ षटकारांच्या मदतीने ११० धावांची खेळी केली.

एका बाजूने तृषा तुफान फटकेबाजी करत होती. तर दुसऱ्या बाजूने कमलिनीने तिला साथ देत ५१ धावा चोपल्या. या खेळीदरम्यान तिने ९ चौकार मारले. तर शेवटी सनिका चालकेने नाबाद २९ धावांची खेळी केली.

स्कॉटलँडचा डाव कोसळला

भारतीय संघाने दिलेल्या डोंगराइतक्या आव्हानाचा पाठलाग करताना स्कॉटलँडच्या फलंदाजांना हवी तशी कामगिरी करता आली नाही. स्कॉटलँडकडून फलंदाजी करताना पीपा केलेने सलामीला फलंदाजी करताना अवघ्या १२ धावांची खेळी केली.

त्यानंतर इम्मा देखील १२ धावा करत माघारी परतली. स्कॉटलँडच्या एकही फलंदाजाला मोठी खेळी करता आली नाही. दरम्यान स्कॉटलँडला हा सामना गमवावा लागला. या विजयासह भारतीय संघाने उपांत्यफेरीत प्रवेश केला आहे.

भारतीय गोलंदाजांची कमाल

फलंदाजांनी कमाल कामगिरी केल्यानंतर गोलंदाजही चमकले. भारतीय संघाकडून गोलंदाजी करताना आयुषीने ३ षटकात ८ धावा खर्च करत ४ गडी बाद केले. तर वैष्णवीने २ षटकात ५ धावा खर्च करत ३ गडी बाद केले. तर फलंदाजीत शतकी खेळी करणाऱ्या तृषाने गोलंदाजीत २ षटकात ६ धावा खर्च करत ३ गडी बाद केले.