India w vs Australia w Highlights: भारतीय महिला संघाला आयसीसी टी-२० वर्ल्डकप स्पर्धेतील सेमीफायनलमध्ये जाण्यासाठी अतिशय महत्वाच्या असलेल्या सामन्यात पराभूत व्हावं लागलं आहे. साखळी फेरीतील शेवटच्या सामन्यात भारताचा सामना ऑस्ट्रेलियाविरुद्ध झाला.

या सामन्यात ऑस्ट्रेलियाने भारतासमोर जिंकण्यासाठी १५१ धावांचे आव्हान ठेवले होते. या धावांचा पाठलाग करताना भारतीय फलंदाजांनी पूर्ण जोर लावला.

भारताकडून हरमनप्रीत कौरने अर्धशतकी खेळी केली. ती शेवटच्या चेंडूपर्यंत टीकून राहिली. मात्र संघाचा विजय आणि सेमीफायनमध्ये जाण्याचं तिकीट अवघ्या ९ धावांनी हुकलं आहे. तर ऑस्ट्रेलियाने स्पर्धेतील सेमीफायनचं तिकीट पक्क केलंय.

भारतीय संघाला अजूनही सेमीफायनलमध्ये जाण्याची संधी?

भारतीय संघाला ऑस्ट्रेलियाविरुद्धच्या सामन्यात पराभवचा सामना करावा लागला असला, तरीदेखील भारतीय संघाचा सेमीफायनलमध्ये जाण्याच मार्ग मोकळा आहे. हा सामना भारतीय संघाने १८ पेक्षा कमी धावांनी गमावला आहे. त्यामुळे जर पाकिस्तान आणि न्यूझीलंड यांच्यात होणाऱ्या सामन्यात पाकिस्तानने न्यूझीलंडला पराभूत केलं, तर भारतीय संघ सेमीफायनलसाठी पात्र ठरु शकतो.

भारतीय संघाला हा सामना जिंकण्यासाठी १५२ धावा करायच्या होत्या. या धावांचा पाठलाग करताना भारतीय संघाकडून सलामीला आलेल्या शेफाली वर्माने २० धावा केल्या. तर महत्वाच्या सामन्यात स्म्रिती मंधाना अवघ्या ६ धावांवर माघारी परतली.

जेमीमा रॉड्रिग्ज १६ धावा करत माघारी परतली. दिप्ती शर्माने २५ चेंडूंचा सामना करत २९ धावांची महत्वपूर्ण खेळी केली. शेवटी भारताची कर्णधार हरमनप्रीत कौर एकटी लढली. तिने संघाला विजय मिळवून देण्यासाठी पूर्ण जोर लावला. तिने अर्धशतकी खेळी केली. मात्र ती संघाला विजय मिळवून देऊ शकली नाही.

ऑस्ट्रेलियाने दिलं १५२ धावांचं आव्हान

या सामन्यात ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला. ऑस्ट्रेलियाने प्रथम फलंदाजी करताना २० षटक अखेर १५१ धावांपर्यंत मजल मारली. ऑस्ट्रेलियाकडून फलंदाजी करताना सलामीला फलंदाजीसाठी आलेल्या ग्रेस हॅरिसने ४० धावांची खेळी केली. वेअरहॅम शून्यावर माघारी परतली. तर बेथ मुनी २ धावांवर माघारी परतली. मॅकग्राने ३२ आणि एलिस पेरीनेही ३२ धावांची खेळी केली