आयसीसी टी-२० वर्ल्डकप २०२४ स्पर्धेनंतर भारतीय संघ ५ टी-२० सामन्यांची मालिका खेळण्यासाठी झिम्बाब्वे दौऱ्यावर आहे. या दोन्ही संघांमध्ये ५ टी-२० सामन्यांची मालिका सुरु आहे. हरारेच्या मैदानावर सुरु असलेल्या या मालिकेतील पहिल्या सामन्यात भारतीय संघाला पराभवाचा सामना करावा लागला होता. तर दुसऱ्या सामन्यात भारतीय संघाने दमदार कमबॅक केलं. सध्या ही मालिका १-१ च्या बरोबरीत आहे. दरम्यान तिसरा सामना जिंकून भारतीय संघ मालिकेत आघाडी घेण्याच्या प्रयत्नात असणार आहे.

या मालिकेतील सुरुवातीच्या दोन्ही सामन्यांमध्ये प्रथम फलंदाजी करणाऱ्या संघाने विजय मिळवला आहे. त्यामुळे तिसऱ्या सामन्यातही नाणेफेक जिंकणारा संघ प्रथम फलंदाजी करण्याचा निर्णय घेऊ शकतो. मालिकेतील पहिल्या सामन्यात भारतीय संघाला १०० धावा करताना नाकी नऊ आले होते. तर दुसऱ्या सामन्यात भारतीय फलंदाजांनी गोलंदाजांवर हल्लाबोल करत २३४ धावांचा डोंगर उभारला.

हरारेच्या मैदानावरील रेकॉर्ड पाहिला, तर आतापर्यंत ४३ सामने खेळले गेले आहेत. यादरम्यान २५ सामने हे प्रथम फलंदाजी करणाऱ्या संघांनी जिंकले आहेत. तर धावांचा पाठलाग करताना १८ संघांनी बाजी मारली आहे. पहिल्या डावात फलंदाजी करुन सामना जिंकणाऱ्या संघांची सरासरी अधिक आहे. त्यामुळे हरारेच्या मैदानावर सामना जिंकायचा असेल, तर नाणेफेक जिंकून प्रथम फलंदाजी करणं हा योग्य निर्णय ठरु शकतो.

हा सामना स्थानिक वेळेनुसार,दुपारी १ वाजता सुरु होणार आहे. Accuweather ने दिलेल्या माहितीनुसार, तापमान २६ डिग्री सेल्सिअस इतकं असण्याचा अंदाज वर्तवण्यात आला आहे. तर पाऊस पडणार नसल्याची शक्यता वर्तवण्यात आली आहे.

या सामन्यासाठी अशी असू शकते भारतीय संघाची प्लेइंग ११:

अभिषेक शर्मा, यशस्वी जयस्वाल, शुभमन गिल (कर्णधार), ऋतुराज गायकवाड़, रियान पराग, रिंकू सिंग, संजू सॅमसन (यष्टिरक्षक), शिवम दुबे, रवी बिश्नोई, आवेश खान, मुकेश कुमार.