IND vs SL 2nd T20 : भारत आणि श्रीलंका यांच्यातील टी-२० मालिकेतील दुसऱ्या सामन्यात श्रीलंकेने भारताचा १६ धावांनी पराभव केला. यासह श्रीलंका (Srilanka)  संघाने तीन सामन्यांच्या मालिकेत १-१ अशी बरोबरी साधली आहे.

हार्दिक पांड्याच्या नेतृत्वाखाली भारताचा हा पहिलाच पराभव आहे. या सामन्यात प्रथम फलंदाजी करताना श्रीलंकेने भारतासमोर २०७ धावांचे लक्ष्य ठेवले होते. प्रत्युत्तरात टीम इंडियाला आठ विकेट्स गमावून केवळ १९० धावा करता आल्या.

या सामन्यात श्रीलंकेचा कर्णधार दासून शनाका आणि कुशल मेंडिस यांनी श्रीलंकेसाठी निर्णायक फलंदाजी केली. त्याचवेळी अक्षर पटेल आणि सूर्यकुमार यादव यांनी भारतासाठी चांगली कामगिरी केली. मात्र, हे दोघेही भारताला विजय मिळवून देऊ शकले नाहीत. मालिकेतील तिसरा आणि निर्णायक सामना ७ जानेवारीला खेळवला जाणार आहे. (Indian Cricket Team)

भारताला अतिरिक्त धावांचा फटका

अर्शदीप सिंग, शिवम वामी आणि उमरान मलिक यांनी टाकलेल्या एकूण ७ नो बॉलवरील फ्री हिटवर जवळपास ३४ धावा अतिरिक्त मिळाल्या. याचाच अर्थ श्रीलंकेला एक षटक अधिकचं खेळण्यास मिळालं. याचाच फटका टीम इंडियाला बसल्याचं दिसून आलं.

भारताचा डाव

राहुल त्रिपाठी पदार्पणाच्या सामन्यात पाच धावांवर बाद झाला. टीम इंडियाच्या २१ धावांत तीन विकेट पडल्यानंतर भारतीय संघ अडचणीत आला. कर्णधार हार्दिकही १२ धावा करून बाद झाला. भारताच्या चार विकेट ३४ धावांवर पडल्या होत्या. सूर्यकुमार यादव आणि दीपक हुड्डा यांनी छोटीशी भागीदारी केली, पण हुडाही नऊ धावांवर बाद झाला. यानंतर अक्षर पटेलसह सूर्यकुमारने वेगवान धावा केल्या.

अक्षर आणि सूर्याने मिळून भारताची धावसंख्या १०० धावांच्या पुढे नेली. या दोघांनी शानदार भागीदारी करून भारताला सामन्यात पुन्हा आणले. पण शेवटी सूर्यकुमार ५१ धावांवर आणि अक्षर ६५ धावा करुन बाद झाला. दोघे बाद झाल्याने भारताचा सामना गमवावा लागला.