राजकोटच्या मैदानावर यशस्वी नावाचं वादळ आलं होतं. यशस्वी जयस्वालने तिसऱ्या कसोटीतील दुसऱ्या डावात शानदार फलंदाजी करत नाबाद २१४ धावांची खेळी केली. आपल्या या खेळीदरम्यान त्याने षटकारांचा पाऊस पाडला.
कसोटीतील एका इनिंगमध्ये या पठ्ठ्याने १२ षटकार लगावले. यासह त्याने कसोटी क्रिकेटमधील एका डावात सर्वाधिक षटकार मारण्याच्या रेकॉर्डची बरोबरी देखील केली. दरम्यान या आक्रमक खेळीनंतर इंग्लंडच्या माजी कर्णधाराने केलेलं वक्तव्य सध्या जोरदार चर्चेत आहे.
इंग्लंडचा माजी कर्णधार ॲलिस्टर कुकने टीएनटी स्पोर्ट्सला दिलेल्या मुलाखतीत म्हटले की, ' मी जितके षटकार माझ्या संपूर्ण कसोटी कारकिर्दीत नाही मारू शकलो तितके षटकार यशस्वीने आज एका इनिंगमध्ये मारले आहेत. यशस्वी जयस्वालने या सामन्यात चौफेर फटकेबाजी करत १२ षटकार मारले. तर १६१ कसोटी सामने खेळणाऱ्या ॲलिस्टर कुकला आपल्या कारकीर्दीत केवळ ११ षटकार मारता आले. षटकार कमी मारले असतील तरी त्याने चौकार मात्र १४४२ मारले आहेत. (Cricket news in marathi)
यशस्वी जयस्वालचा जलवा..
यशस्वी जयस्वालने या डावात इंग्लंडच्या गोलंदाजांचा चांगलाच समाचार घेत एकूण १२ षटकार मारले. यासह तो कसोटी क्रिकेटमधील एका डावात सर्वाधिक षटकार मारणारा भारतीय फलंदाज ठरला आहे.
तसेच कसोटी क्रिकेटच्या इतिहासात एकाच डावात सर्वाधिक षटकार मारण्याच्या बाबतीत त्याने वसीम अक्रमच्या विक्रमाची बरोबरी केली आहे. वसीम अक्रमने देखील कसोटीतील एकाच डावात १२ षटकार मारले होते.
यासह यशस्वी जयस्वालच्या नावे आणखी एका मोठ्या विक्रमाची नोंद झाली आहे. यशस्वी जयस्वालने या मालिकेत २० षटकार मारले आहेत. एकाच कसोटी मालिकेत २० षटकार मारणारा तो पहिलाच भारतीय सलामीवीर फलंदाज ठरला आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.