भारताचा स्टार गोलंदाज मोहम्मद सिराज हा नेहमीच चर्चेत असतो. गोलंदाजी असो की फलंदाजी, मैदानात असो की मैदानाबाहेर, सिराजची चर्चा झाल्याशिवाय एकही सामना होत नसतो.

ॲडलेड कसोटीत तो ट्रेविस हेडसोबत भिडताना दिसून आला होता. मात्र यावेळी तो वेगळ्या कारणामुळे चर्चेत आला आहे. ज्याचा व्हिडिओ सध्या सोशल मीडियावर तुफान व्हायरल होतोय. आधी ट्रेविस हेड आणि आता तो मार्नस लाबुशेनसोबत भिडताना दिसून आला आहे.

भारत आणि ऑस्ट्रेलिया यांच्यातील दुसरा कसोटी सामना ब्रिस्बेनमध्ये सुरू आहे. या मालिकेतील दुसऱ्या दिवशी मजेशीर घटना पाहायला मिळाली. गोलंदाजी करत असलेला सिराज आपलं षटक संपलवल्यानंतर लाबुशेनच्या दिशेने गेला.

त्यानंतर त्याने स्टंपची बेल्स अल्टी पल्टी केली. हे लाबुशेनला मुळीच आवडलं नाही. त्यावेळी लाबुशेनने सिराजला विचारपूस करण्याचा प्रयत्न केला. मात्र सिराज तिथून निघून गेला. त्यानंतर शुभमन गिलने सिराजच्या खांद्यावर हात ठेवला आणि दोघेही निघून गेले.

सिराजची जादू कामी आली..

सिराजने बेल्स अल्टी पल्टी केल्यानंतर लाबुशेन परत आला आणि त्याने बेल्स आधी जशी होती तशीच ठेवली. मात्र याचा काहीच फायदा झाला नाही. सिराजला जे करायचं होतं ते पूर्ण झालं. कारण पुढच्या षटकात नितीश कुमार रेड्डी गोलंदाजीला आला आणि त्याने या षटकात लाबुशेनची विकेट मिळवली.

नितीश रेड्डीने टाकलेला चेंडू हा लाबुशेनच्या बॅटची कडा घेत, स्लीपमध्ये असलेल्या विराट कोहलीच्या हातात गेला. सिराजने जे काही केलं होतं. त्यामुळे लाबुशेन ची नजर हटली होती. नजर हटताच दुर्घटना घडली. सिराजने त्याची एकाग्रता भंग केली होती. याचा फायदा नितीश रेड्डीला झाला. त्याने लाबुशेनला ५५ चेंडूत १२ धावांवर माघारी धाडले.

लाबुशेनला या मालिकेत हवी तशी कामगिरी करता आलेली नाही. या मालिकेत त्याला केवळ एकदाच ५० धावांचा आकडा गाठता आला आहे. पहिल्या कसोटीत फलंदाजी करताना त्याक २ आणि ३ धावा करता आल्या होत्या. त्यानंतर दुसऱ्या कसोटीत त्याने ६४ धावांची खेळी केली होती.