India vs Australia, 3rd T2OI:

भारत आणि ऑस्ट्रेलिया या दोन्ही संघांमध्ये ५ टी-२० सामन्यांच्या मालिकेचा थरार सुरु आहे. या मालिकेतील तिसरा सामना गुवाहाटीच्या मैदानावर पार पडला. या सामन्यात प्रथम फलंदाजी करत असलेल्या भारतीय संघाने २२२ धावांचा डोंगर उभारला होता.

आव्हान तसं मोठं होतं. मात्र ऑस्ट्रेलियाने या धावांचा यशस्वी पाठलाग करत भारतीय संघावर ५ गडी राखून विजय मिळवला. या सामन्यात भारतीय संघाचा विजय निश्चित दिसत होता. मात्र शेवटच्या षटकात सामना फिरला.

इथेच फिरला सामना...

शेवटच्या २ षटकापर्यंत भारतीय संघ आघाडीवर होता. कारण ऑस्ट्रेलियाला शेवटच्या १२ चेंडूंमध्ये विजयासाठी ४३ धावांची गरज होती. इथून भारतीय संघाचा विजय निश्चित दिसत होता. त्यावेळी ग्लेन मॅक्सवेल आणि मॅथ्यू वेड खेळपट्टीवर होते.

भारतीय संघाकडून १९ वे षटक टाकण्यासाठी अक्षर पटेल गोलंदाजीला आला होता. या षटकात मॅक्सवेल आणि वेडच्या जोडीने मिळून २२ धावा जोडल्या. शेवटच्या ६ चेंडूंवर ऑस्ट्रेलियाला विजयासाठी २१ धावांची गरज होती. (Latest sports updates)

कर्णधार सूर्यकुमार यादवने शेवटचे षटक टाकण्याची जबाबदारी प्रसिद्ध कृष्णावर सोपवली. असं वाटलं होतं की,तो २१ धावांचा यशस्वीरीत्या बचाव करत संघाला विजय मिळवून देईल. मात्र असं काहीच झालं नाही.

प्रसिद्ध कृष्णाच्या षटकातील पहिल्याच चेंडूवर मॅथ्यू वेडने चौकार मारला. त्यानंतर त्याने पुढील चेंडूवर एक धाव घेत ग्लेन मॅक्सवेलला स्ट्राईक दिली. ग्लेन मॅक्सवेलने प्रसिद्ध कृष्णाच्या गतीचा पुरेपूर वापर केला. त्याने एक षटकार आणि पुढील सलग तीन चौकार मारुन ऑस्ट्रेलियाला विजय मिळवून दिला. या विजयासह ऑस्ट्रेलियाने ५ टी-२० सामन्यांच्या मालिकेत २-१ ने कमबॅक केलं आहे.