ICC Under 19 World Cup : आयसीसी अंडर 19 वर्ल्डकपमध्ये टीम इंडियाच्या पोरींनी इतिहास रचला आहे. भारत वि. मलेशिया या सामन्यामध्ये भारतीय संघाने फक्त 17 बॉलमध्ये मलेशियाचा पराभव केला आहे. मलेशियाचा संघ 31 धावांवर ऑल आऊट झाला. पुढे भारतीय महिला फलंदाजांनी फक्त 2.5 ओव्हर्समध्ये सामना जिंकला.

भारतीय महिला संघासाठी अंडर 19 वर्ल्डकपमध्ये आतापर्यंत भारताने दोन सामने खेळले आहेत. पहिल्या सामन्यात भारताने 9 विकेट्सने वेस्ट इंडिजचा पराभव केला होता. आता दुसऱ्या सामन्याने संघाने 17 बॉलमध्ये मलेशियाला ऑल आऊट करुन दुसरा विजय मिळवला आहे. या विजयामुळे ग्रुप स्टेजच्या यादीत भारत पहिल्या क्रमांकावर पोहोचला आहे.

सामन्यात भारताने टॉस जिंकला आणि फिल्डींग करण्याचा निर्णय घेतला. दुसऱ्या ओव्हरमध्ये मलेशियाला पहिला धक्का मिळाला. त्यानंतर 14 व्या ओव्हरपर्यंत संघातील सर्व खेळाडू बाद झाले. भारतीय संघातील स्टार फिरकीपटू वैष्णवी शर्माने तर कमालच केली. तिने फक्त 5 धावा देत 5 गडी बाद केले. यात तिने 14 व्या ओव्हरमध्ये घेतलेल्या हॅट्रिकचा देखील समावेश आहे.

मलेशियाने संपूर्ण सामन्यात फक्त 31 धावा केल्या. फलंदाजीला उतरल्यानंतर भारतीय संघातील सलामीवीरांनी फक्त 17 बॉलमध्ये 32 धावा केल्या. मलेशियाच्या संघातील गोलंदाजांना एकाही बाद करता आले नाही. मलेशियानंतर भारतीय अंडर 19 महिला टीम 23 जानेवारीला श्रीलंकेचा सामना करणार आहे.