टी 20 विश्वचषक (T-20 World Cup) आजपासून (17 ऑक्टोबर) सुरू होणार आहे. या स्पर्धेत भारतीय संघ आणि पाकिस्तान (IND vs PAK T20) आपला पहिला सामना एकमेकांविरुद्ध खेळणार आहेत. हा सामना 24 ऑक्टोबर रोजी होणार आहे. क्रिकेट चाहते या मोठ्या सामन्याची आतुरतेने वाट पाहत होते, पण खेळाडूंना त्याअगोदर धमक्या येऊ लागल्या आहेत. एका चाहत्याने पाकिस्तानी कर्णधार बाबर आझमला उघडपणे धमकी दिली आहे.

वास्तविक, 15 ऑक्टोबर रोजी यूएईला निघत असतानाचा, एक फोट बाबर आझमने सोशल मीडियावर शेअर केला. त्यात असेही लिहिले होते की, 'तुमच्या (चाहत्यांच्या) समर्थनापेक्षा काहीही मोठे नाही. नेहमी तुम्ही संघाच्या पाठीशी उभे रहा. समर्थन करा, प्रार्थना करा आणि विश्वास ठेवा.'' बाबर आझमच्या या पोस्टला उत्तर देताना एका चाहत्याने लिहिले, '24 ऑक्टोबरला (भारताविरुद्ध) सामना जिंक, नाहीतर मी तुला घरी येऊ देणार नाही.'

दुसर्‍या वापरकर्त्याने बाबर आझमच्या पोस्टवर एक व्हिडिओ शेअर केला. तसेच धमकी देणाऱ्या शब्दात लिहिले की ही शेवटची संधी आहे बाबर भाई. त्याचबरोबर बाबर आझमने हा सामना कोणत्याही किंमतीत जिंकण्याचे बोलले आहे. स्पर्धेपूर्वी बाबर म्हणाला की आम्हाला युएईमधील परिस्थिती अधिक चांगल्या प्रकारे माहीत आहे, कारण आम्ही गेली ३ वर्षे येथे क्रिकेट खेळत आहोत. आम्हाला माहित आहे की येथे खेळपट्टी कशी आहे. सामन्याच्या दिवशी जो संघ अधिक चांगले खेळेल तो जिंकेल. मला विश्वास आहे की आपण जिंकू.

क्रिकेटच्या या छोट्या फॉरमॅटमध्ये भारतीय संघ पाकिस्तानवर वर्चस्व गाजवत आहे. टीम इंडियाने आतापर्यंत खेळलेल्या 8 पैकी 6 टी -20 मध्ये पाकिस्तानला (IND vs PAK T20) पराभूत केले आहे. तर पाकिस्तानने फक्त एका सामन्यात विजय मिळवला आहे. उर्वरित एक सामना टाय होता. 25 डिसेंबर 2012 रोजी पाकिस्तान संघाने एकमेव सामना जिंकला आहे.

Edited By: Pravin Dhamale