पॅरिस ऑलिम्पिक २०२४ स्पर्धेचा बिगुल वाजला आहे. या स्पर्धेला येत्या २६ जुलैपासून सुरुवात होणार आहे. ११ ऑगस्टपर्यंत सुरु राहणाऱ्या या स्पर्धेत खेळाडू आपल्या देशाचा मान वाढविण्यासाठी जोर लावताना दिसून येणार आहेत. या स्पर्धेत एकूण १०,५०० खेळाडू मैदानात उतरणार आहे. मात्र तुम्हाला माहितेय का,पॅरिस ऑलिम्पिक २०२४ स्पर्धेत किती खेळांचा समावेश असणार आहे? नाही माहित ना? जाणून घ्या.

ऑलिम्पिक स्पर्धेसाठी सिटी ऑफ लव्ह म्हणजे, पॅरिस सजलंय. इथेच पॅरिस ऑलिम्पिक २०२४ स्पर्धेचा थरार रंगणार आहे. या स्पर्धेत एकूण ३२ खेळांचा समावेश करण्यात आला आहे. या ३२ खेळातील ३२९ इव्हेंट्समध्ये खेळाडू आपलं नशीब आजमवताना दिसून येणार आहेत.

पॅरिस ऑलिम्पिक २०२४ स्पर्धेत ५ नव्या खेळांचा समावेश करण्यात आला आहे. ज्यात काईटबॉर्डिंग, कायक क्रॉस, स्विमिंग आणि मॅरेथॉन रेस वॉक रिले आणि मेन्स ऑर्टिस्टिक या खेळांचा समावेश आहे. या ५ खेळांचा समावेश केल्यानंतर खेळांची संख्या ३२ वर जाऊन पोहोचली आहे. पॅरिस ऑलिम्पिक २०२४ स्पर्धेला अधिकृतरित्या २६ जुलैला सुरुवात होणार आहे. यादिवशी भव्य दिव्य असा उद्घाटन सोहळा पार पडणार आहे. मात्र उद्घाटन सोहळ्यापूर्वी २४ जुलै रोजी काही फुटबॉल आणि रग्बी या खेळांना सुरुवात होणार आहे.

यावेळी भारताकडून ११३ खेळाडू पदकावर नाव कोरण्यासाठी पॅरिसला रवाना झाले आहेत. यापूर्वी २०२० मध्ये झालेल्या टोकियो ऑलिम्पिक स्पर्धेत भारतीय खेळाडूंनी ७ पदकं जिंकली होती. ऑलिम्पिकमध्ये भारताने आतापर्यंत १० पदकं जिंकली आहेत. यावेळी हा आकडा वाढण्याची शक्यता आहे.