आशिया कप २०२५ सुपर ४ च्या दुसऱ्या सामन्यात काल भारताने पुन्हा एकदा पाकिस्तानवर मात केली आहे. प्रथम फलंदाजी करताना पाकिस्तानने भारतासमोर १७२ धावांचे आव्हान ठेवले होते मात्र टीम इंडियाच्या अभिषेक शर्माच्या वादळी खेळीमुळे ७ चेंडू आणि ६ विकेट्स शिल्लक असताना हे लक्ष्य सहज गाठले.असे असले तरी कालचा सामना चर्चेचा विषय ठरला आहे. या सामन्यापूर्वी गोलंदाज हारिस रउफचे हातवारे वादग्रस्त ठरले आहेत.

पाकिस्तानने गेली अनेक वर्ष देशात दहशतवाद पोसला. त्यामुळे त्यांच्यावर भीक मागण्याची वेळ आली आहे. पण कुत्र्याचं शेपूट वाकडं ते वाकडंच. २२ एप्रिल रोजी झालेल्या पहलगाम दहशतवादी हल्ल्यानंतर भारताने पाकिस्तानला चांगलाच दणका दिला. अनेक दहशतवादी ठिकाणं उद्ध्वस्त केली. तसेच आंतरराष्ट्रीय पातळीवर आणि क्रिकेटच्या मैदानातही त्यांना त्यांची जागा दाखवून दिली. आशिया कप स्पर्धेत साखळी फेरीच्या पहिल्या सामन्यात भारताने पाकिस्तानसोबत हातमिळवणी केली नाही. त्यामुळे पाकिस्तान संघाचा जळफळाट झाला होता.

आंतरराष्ट्रीय पातळीवर नाचक्की झाल्यानंतर वाटेल ते करू लागला. मग सामनाधिकारी अँडी पायक्रॉफ्ट यांची हकालपट्टी करण्याची मागणी केली. तसेच युएईविरुद्धचा सामना खेळणार नसल्याची धमकी दिली. पण शेवटी नाक घासत मैदानात खेळणं भाग पडलं. काल पुन्हा एकदा भारत पाकिस्तान संघ आमनेसामने आले. सुपर ४ फेरीतील भारताविरूद्धच्या सामन्यापूर्वी पाकिस्तानचा संघ दुबईत सराव करत होता. या सरावादरम्यान पाकिस्तानी वेगवान गोलंदाज हारिस रउफने त्याच्या हाताने ६-० असा इशारा केला. तसेच ६-० असा जोराने ओरडत होता. या माध्यमातून तो ऑपरेशन सिंदूरवरून डिवचण्याचा प्रयत्न करत होता, असं म्हटलं जात आहे.

पहलगाम हल्ल्यानंतर भारताने ऑपरेशन सिंदूर पार पाडलं. यावेळी दोन्ही देशात युद्धजन्य स्थिती होती. यावेळी पाकिस्तानने आणि तिथल्या मीडियाने भारताची सहा लढाऊ विमानं पाडल्याचा दावा केला होता. आता हारिस रउफ तेच सांगत असल्याचा दावा केला जात आहे. या घटनेचा व्हिडिओ सोशल मीडियावर सध्या व्हायरल होत आहे. त्यामुळे हारिस रउफला ट्रोल केलं जात आहे.असे असले तरी त्याने कोणाकडे पाहून असं केलं याबाबत अद्याप काही स्पष्टता नाही. हे हातवारे भारतावर केलेली व्यंग्यात्मक टिका होती की पाकिस्तान संघ आपापसात खेळत असलेल्या फुटबॉल सामन्याचा स्कोअर होता हे स्पष्ट झालेले नाही.