आयसीसी टी -२० वर्ल्डकप २०२४ स्पर्धेसाठी भारतीय संघाची घोषणा करण्यात आली आहे. या संघाची घोषणा झाल्यानंतर भारतीय संघातील काही फलंदाज फ्लॉप कामगिरी करताना दिसून आले. मात्र आता भारतीय संघासाठी गुड न्यूज समोर आली आहे. संघात निवड झालेले खेळाडू फॉर्ममध्ये परारल्याचे पाहायला मिळाले आहे. ज्यात सूर्यकुमार यादवचं देखील नाव जोडलं गेलं आहे. सनरायझर्स हैदराबादविरुद्ध झालेल्या सामन्यात सूर्यकुमार यादवने शतकी खेळी केली आहे.

सनरायझर्स हैदराबादने दिलेल्या १७४ धावांचा पाठलाग करताना मुंबई इंडियन्स संघाकडून सूर्यकुमार यादवने शानदार शतकी खेळी साकारली. त्याने ५१ चेंडूंचा सामना करत १२ चौकार आणि ६ षटकारांच्या साहाय्याने नाबाद १०२ धावांची खेळी केली. सूर्याच्या या तुफान खेळीचा मुंबई इंडियन्स संघाला फायदा होणार नसला तरीदेखील भारतीय संघाला याचा नक्कीच फायदा होणार आहे. कारण आयपीएल २०२४ स्पर्धा झाल्यानंतर लगेचच टी -२० वर्ल्डकप स्पर्धेला सुरुवात होणार आहे.

सूर्याचं हे या हंगामातील पहिलंच शतक ठरलं आहे. यापूर्वी विराट कोहली, यशस्वी जयस्वाल आणि रोहित शर्मानेही शतक झळकावलं आहे. भारतीय संघातील टॉप ऑर्डरचे फलंदाज चांगल्याच फॉर्ममध्ये आहे. त्यामुळे भारतीय संघाची टी -२० वर्ल्डकपची ट्रॉफी जिंकण्याची शक्यता आणखी वाढली आहे.

मुंबईचा शानदार विजय..

मुंबईच्या वानखेडे स्टेडियमवर पार पडलेल्या या सामन्यात मुंबई इंडियन्सने नाणेफेक जिंकत प्रथम गोलंदाजी करण्याचा निर्णय घेतला. प्रथम फलंदाजी करण्यासाठी आलेल्या सनरायझर्स हैदराबाद संघाकडून ट्रेविस हेडने ४८ धावांची खेळी केली. इतर कुठल्याही फलंदाजाला मोठी खेळी करता आली नाही. सनरायझर्स हैदराबादला २० षटकअखेर १७३ धावा करता आल्या. या धावांचा पाठलाग करताना मुंबई इंडियन्सकडून सूर्यकुमार यादवने शतकी खेळी केली. तर तिलक वर्मानेही महत्त्वपूर्ण खेळी करत संघाला विजय मिळवून दिला.