टीम इंडियाने आयसीसी टी-२० चा वर्ल्डकप जिंकला. मात्र अहमदाबादच्या मैदानात झालेल्या या सामन्यात एक घटना अशी घडली, ज्यामुळे अर्शदीपवर कारवाई देखील झाली. टीम इंडियाचा वेगवान गोलंदाज अर्शदीप सिंह न्यूझीलंडच्या डॅरेल मिचेलशी भिडला. अर्शदीपने त्याच्या गोलंदाजीवर मिचेलने मारलेला शॉट रोखला. यानंतर त्याने बॉल मिचेलच्या दिशेने फेकला. हा बॉल जाऊन थेट मिचेलच्या पायावर बसला. या घटनेमुळे दोघांमध्ये बाचाबाची झाली.

भर मैदानात घडलेल्या या घटनेदरम्यान सूर्यकुमारने मध्यस्थी करत प्रकरण शांत केलं. दरम्यान, या सामन्यानंतर अर्शदीपने मिचेलची माफीही मागितली. पण आता यावर टीम इंडियाचा प्रमुख कोच गौतम गंभीरने विधान केले असून, अर्शदीपला असं करण्याची गरज नव्हती, असं म्हटलं आहे.

नेमकं प्रकरण काय आहे?

फायनलच्या सामन्यात अर्शदीप ११ वी ओव्हर फेकण्यासाठी आला होता. त्या ओव्हरच्या दुसऱ्या आणि तिसऱ्या बॉलवर मिचेलने सलग दोन सिक्स लगावले होते. तर पाचव्या चेंडूवर मिचेलने सरळ शॉट खेळला. अर्शदीपने त्याच्याकडे आलेला हा बॉल रोखला आणि रन आऊट करण्यासाठी मिचेलच्या दिशेने थ्रो केला. मात्र, यावेळी त्याने स्टंपच्या दिशेने थ्रो न करता काहीसा मिचेलच्या दिशेने चेंडू मारला. तो बॉल मिचेलच्या पायाला लागला आणि तो नाराज झाला.

अर्शदीपच्या या कृत्याने मिचेल चिडला होता. त्यावेळी सूर्यकुमारने लगेच मिचेलजवळ येत त्याच्याशी चर्चा केली आणि प्रकरण शांत केलं. आपण केलेल्या कृत्याचा पश्चात्ताप अर्शदीपला झाला आणि त्याने फायनल जिंकल्यानंतर मिचेलची माफी मागितली.

गंभीरने काय म्हटलं?

ANI च्या पॉडकास्टमध्ये बोलताना गंभीर म्हणाला की, जर तुम्ही देशाच्या टीमची जर्सी घालता, तर तुम्हाला आक्रमकता दाखवावी लागेल. जर तुम्ही थ्रो बॅक करत असाल, तर त्यामध्ये काहीही चुकीचं नाहीये. जर तुम्हाला दोन सिक्स बसलेत, तर तुमची ही आक्रमकता योग्य आहे. मी माझ्या खेळाडूंना याच पद्धतीच्या ॲग्रेशनमध्ये पाहू इच्छितो.

गंभीर पुढे म्हणाला की, त्याने जरी सॉरी नसतं म्हटलं, तरीही काही अडचण नव्हती. त्याला माफी मागण्याची काही आवश्यकता नव्हती. क्रिकेटमध्ये कोणी मित्र किंवा शत्रू नसतं. परंतु सोशल मीडियावर अनेक गोष्टी चढवून सांगितल्या जातात.

अर्शदीपवर कारवाई

या घटनेवरून अर्शदीपला आयसीसीने शिक्षा देखील दिली. टी-२० वर्ल्डकप २०२६ च्या फायनलदरम्यान आचारसंहितेचं उल्लंघन केल्याप्रकरणी त्याच्या मॅच फीमधून १५ टक्के दंड ठोठावण्यात आला आहे. याशिवाय त्याच्या खात्यात एक डिमेरिट पॉईंट देखील जोडण्यात आला आहे.