FIFA World Cup 2022:  फिफा विश्वचषक 2022 यजमान कतारला स्पर्धेत सलग दुसऱ्यांदा पराभवाला सामोरे जावे लागले आहे. सेनेगलने कतारला ३-१ अशा फरकाने पराभूत केले आहे.

सेनेगलने संपूर्ण सामन्यात आपले वर्चस्व कायम ठेवलं आणि कतारला फार कमी संधी मिळाल्या. सलग दुसऱ्या पराभवामुळे यजमान देशाचे पुढील फेरीत जाण्याचे स्वप्नही भंगले आहे. (Football)

सामन्याच्या सुरुवातीपासूनच सेनेगलने कतारवर दबाव आणण्यास सुरुवात केली आणि पहिल्या 10 मिनिटांत 2-3 उत्कृष्ट अटॅक केले. पहिल्या अर्ध्या तासाच्या खेळावर नजर टाकली, तर निश्चितपणे सेनेगलचा संघ अधिक वरचढ होता.

सेनेगलने कतारला अटॅक करण्याच्या फार कमी संधी दिल्या. 41व्या मिनिटाला पहिला गोल करत सेनेगलने सामन्यात आघाडी घेतली. बुलाये डियाने बॉल गोलपोस्टमध्ये टाकला. फर्स्ट हाफमध्ये कतारचा संघ सतत संघर्ष करताना दिसला.

सेकंड हाफमध्येही सुरुवातीलाच सेनेगलने आणखी एक गोल करत कतारच्या अडचणी वाढवल्या. तिसर्‍याच मिनिटाला कॉर्नरवर हेडरद्वारे फमारा दिध्यूने अप्रतिम गोल करून सेनेगलची आघाडी 2-0 अशी केली. कतारने सुमारे 15 मिनिटांनंतर दोन उत्तम संधी निर्माण केल्या, परंतु दोन्ही वेळा त्या संधी गमावल्या.

कतारने 78व्या मिनिटाला गोल नोंदवून सामना रोमांचक केला. इस्माईल मोहम्मदच्या क्रॉसवर मोहम्मद मुंतारीने शानदार हेडरद्वारे कतारसाठी हा गोल केला. त्यानंतर पाच मिनिटांनी सेनेगलने उत्तम चाल केली आणि बँबा डिएंगने शानदार फटकेबाजी करत सेनेगलला 3-1 अशी विजयी आघाडी मिळवून दिली.