पुणे: पुणे पोलिसांनी (Pune Police) शहरात सुरू असणाऱ्या IPL सामान्यांवरील सट्टाबाजाराचा पर्दाफाश केला आहे. या कारवाईदरम्यान पोलिसांनी क्रिकेटवरील आंतरराष्ट्रीय सट्ट्याचा पर्दाफाश करत दोन बड्या बुकींना ताब्यात घेतले आहे. पोलिसांनी या कारवाईदरम्यान दोघांकडून तब्बल ९२ लाख रुपयांची रोख रक्कम आणि काही ऐवजही जप्त केला आहे. सट्टाकिंग गणेश भुतडा आणि अशोक देहूरोडकर अशी ताब्यात घेतलेल्या दोघांची नावे आहेत. याप्रकरणी मार्केटयार्ड आणि समर्थ पोलीस ठाण्यात गुन्हा दाखल करण्यात आला आहे.

आयपीएल क्रिकेट सामन्यावर सट्टा लावला जात असल्याची माहिती पुणे पोलिसांना मिळाली होती. दोन वेगवेगळ्या पथकांनी एकाच वेळी नाना पेठ आणि मार्केटयार्डमध्ये छापेमारी केली. त्यावेळी पोलिसांना मोठ्या प्रमाणात रोकड मिळाली. दोन्ही ठिकाणावर ९२ लाख रुपये रोख आणि ६५ हजार रुपयांचा ऐवज मिळाला आहे. पुणे, पिंपरी चिंचवड आणि जिल्ह्यातील अनेकांचे धागे हाती लागले आहेत. त्यामुळे या बुकिंबाबत अजून तपास पोलीस करत आहेत.

Edited By: Pravin Dhamale