IPL 2023: आयपीएल २०२३ स्पर्धेतील अंतिम सामना नुकताच पार पडला. या सामन्यात चेन्नई सुपर किंग्ज आणि गुजरात टायटन्स हे दोन्ही संघ आमने सामने आले होते.

या सामन्यात शेवटच्या चेंडूवर रवींद्र जडेजाने चौकार मारून आपल्या संघाला विजय मिळवून दिला. यासह चेन्नई सुपर किंग्ज संघाने पाचव्यांदा जेतेपदाला गवसणी घातली आहे.

दरम्यान या विजयानंतर आयपीएलच्या ट्रॉफीची तिरुपती चरणी पुजा करण्यात आली आहे.

तिरुपती चरणी आयपीएलची ट्रॉफी..

चेन्नई सुपर किंग्ज संघाने जोरदार कामगिरी करत पाचव्यांदा आयपीएलची ट्रॉफी जिंकली आहे. ही ट्रॉफी जिंकल्यानंतर चेन्नईचा संघ अहमदाबादमधून चेन्नईला रवाना झाला. चेन्नई एअरपोर्टवरून ही ट्रॉफी थेट चेन्नईतील प्रतिष्ठीत तिरुपती मंदिरात नेण्यात आली.

यावेळी चेन्नई सुपर किंग्ज संघातील एकही खेळाडू उपस्थित नव्हता. या ट्रॉफीचे फोटो सध्या सोशल मीडियावर जोरदार व्हायरल होत आहेत. या पूजेसाठी बीसीसीआयचे माजी अध्यक्ष एन श्रीनिवासन यांनी देखील हजेरी लावली होती. (Latest sports updates)

चेन्नई सुपर किंग्ज संघावर २ वर्षांसाठी बंदी घातली गेली होती. त्यानंतर २०१८ मध्ये चेन्नई सुपर किंग्ज संघाने कमबॅक करत ट्रॉफी जिंकली होती. या विजयानंतर चेन्नईतील तिरुपती मंदिरात ट्रॉफीची पूजा करण्यात आली होती. त्यानंतर ही परंपरा सुरु झाली.

या सामन्याबद्द्ल बोलायचं झालं तर रविवारी (२८ मे) हा सामना पावसामुळे होऊ शकला नव्हता. त्यामुळे रिझर्व्ह डे म्हणजेच सोमवारी (२९ मे) हा सामना खेळवला गेला. या सामन्यात चेन्नई सुपर किंग्ज संघाला विजयासाठी १५ षटकात १७१ धावांची गरज होती.

हा सामना शेवटच्या चेडूपर्यंत गेला होता. शेवटच्या २ चेंडूंवर १० धावांची गरज होती. त्यावेळी रवींद्र जडेजाने पाचव्या चेंडूवर षटकार आणि अंतिम चेंडूवर चौकार मारून संघाला विजय मिळवून दिला.