मुंबई: कर्णधार रोहित शर्माच्या नेतृत्वाखालील टीम इंडियाविरुद्धच्या टी-२० आणि वनडे मालिकेत इंग्लंडला मायदेशातच पराभवाचा जबरदस्त झटका बसला. त्यानंतर टीम इंग्लंडमध्ये मोठी घडामोड घडली आहे. इंग्लंडचा सुपरस्टार अष्टपैलू खेळाडू बेन स्टोक्स यानं एकदिवसीय क्रिकेटमधून निवृत्ती जाहीर केली आहे. (Ben Stokes announces retirement from ODI cricket)

बेन स्टोक्स (Ben Stokes) याने सोशल मीडिया अकाउंटवरून वनडे क्रिकेटमधून निवृत्तीची घोषणा केली. मंगळवारी १९ जुलै रोजी दक्षिण आफ्रिका (England vs South Africa) विरुद्ध होणारा वनडे सामना या प्रकारातील त्याच्या कारकिर्दीतील शेवटचा असेल, असेही त्याने पोस्टमध्ये म्हटलं आहे.

इंग्लंड आणि दक्षिण आफ्रिका यांच्यात मंगळवारपासून ३ सामन्यांची वनडे मालिका सुरू होत आहे. त्यातील पहिला सामना हा डरहममध्ये खेळवला जाणार आहे. स्टोक्सचा हा होम ग्राउंड आहे. इथेच होत वनडे क्रिकेटमधून निवृत्ती घेणार आहे.

अवघ्या ३१ व्या वर्षी बेन स्टोक्स याने वनडे क्रिकेटमधून निवृत्ती घेण्याचा निर्णय घेतला आहे. स्टोक्सनेच या प्रकारात इंग्लंडला वर्ल्ड चॅम्पियन केलं होतं. तीन वर्षांपूर्वी जुलैमध्येच स्टोक्सने लॉर्ड्स मैदानावर न्यूझीलंडविरुद्ध अंतिम सामन्यात ८४ धावांची अविस्मरणीय नाबाद खेळी केली होती. त्या जोरावर तो सामना सुपर ओव्हरमध्ये पोहोचला होता. सुपर ओव्हर देखील बरोबरीत सुटला होता. त्यानंतर अधिक चौकारांमुळे इंग्लंड विजेता ठरला होता. स्टोक्सला या लढतीत प्लेअर ऑफ द मॅचचा पुरस्कार देण्यात आला होता.

अलीकडेच इंग्लंड टेस्ट संघाचा कर्णधार म्हणून निवड झालेल्या स्टोक्सने सोशल मीडियावर केलेल्या पोस्टमध्ये या निर्णयाची घोषणा केली. स्टोक्स म्हणाला की, मी मंगळवारी डरहममध्ये इंग्लंडकडून वनडेमध्ये अखेरचा सामना खेळणार आहे. मी या प्रकारातून निवृत्ती घेण्याचा निर्णय घेतला आहे. हा निर्णय घेणे माझ्यासाठी कठीण होता. इंग्लंडकडून खेळताना आपल्या सहकाऱ्यांसोबत प्रत्येक क्षणाचा आनंद लुटला. माझा हा प्रवास खूपच अविस्मरणीय ठरला.