भारतीय क्रिकेट संघाचे माजी प्रशिक्षक आणि क्रिकेटपटू अंशुमन गायकवाड हे कॅन्सरशी झुंज देत असल्याची माहिती समोर आली होती. गेल्या अनेक दिवसांपासून अंशुमन गायकवाड यांच्यावर लंडनमध्ये उपचार सुरू असून त्यांची आर्थिक परिस्थितीही ढासळल्याची माहिती समोर आली होती. माजी क्रिकेटपटू कपिलदेव यांनी याबाबत बीसीसीआयकडे मदतीची मागणी केली होती. कपिलदेव यांच्या मागणीनंतर बीसीसीआयने अंशुमन गायकवाड यांच्या मदतीसाठी धावली आहे.

याबाबत सविस्तर माहिती अशी की, ब्लड कॅन्सरशी झुंज देणाऱ्या माजी क्रिकेटपटू अंशुमन गायकवाड यांना बीसीसीआयने मदतीचा हात दिला आहे. बीसीसीआयचे सचिव जय शाह यांनी कॅन्सरशी झुंज देत असलेले भारताचे दिग्गज क्रिकेटपटू अंशुमन गायकवाड यांना तात्काळ एक कोटी रुपये देण्याचे आदेश दिले आहेत.

तत्पुर्वी जय शाह यांनी गायकवाड यांच्या कुटुंबीयांशीही बोलून परिस्थितीचा आढावा घेतला आणि ही मदत घोषित केली. अंशुमन गायकवाड यांच्यावर गेल्या एका वर्षापासून लंडनच्या किंग कॉलेज रुग्णालयात उपचार सुरु आहेत. भारताचे माजी क्रिकेटपटू कपिल देव यांनी याबाबतची माहिती देत बीसीसीआयकडे मदत मागितली होती.

तसेच माजी सहकारी मोहिंदर अमरनाथ, सुनील गावसकर, संदीप पाटील, दिलीप वेंगसरकर, मदनलाल, रवी शास्त्री आणि कीर्ती आझाद हे गायकवाड यांच्या उपचारासाठी निधी मिळावा यासाठी प्रयत्न करत असल्याचे म्हटले होते.