भारतीय क्रिकेट नियामक मंडळ (बीसीसीआय) हे जगातील सर्वात श्रीमंत क्रिकेट बोर्डपैकी एक आहे. जय शहा हे या बोर्डचे सचिव आहेत. दरम्यान लवकरच ते आयसीसीचे अध्यक्ष बनू शकतात, अशी चर्चा सुरु आहे.

सध्या ग्रेग बार्कले हे आयसीसीचे अध्यक्ष आहेत. दरम्यान त्यांचा कार्यकाळ समाप्त होणार असून, ते पुन्हा एकदा या पदासाठी निवडणूक लढवणार नसल्याचं म्हटलं जात आहे. असं झाल्यास जय शहा हे बीसीसीआयचे सर्वात तरुण अध्यक्ष बनू शकतात.

जय शहा हे गेल्या काही वर्षांपासून बीसीसीआयच्या सचिवपदाची जबाबदारी योग्यरित्या पार पाडत आहे.ग्रेग बार्कले यांनी पुन्हा या पदासाठी निवडणूक लढवली नाही, तर जय शहा हे पद स्वीकारण्यासाठी प्रबळ दावेदार असल्याचं म्हटलं जात आहे.

असं झाल्यास जय शहा हे आयसीसीचं अध्यक्षपद भुषवणारे पाचवे भारतीय ठरतील.यापूर्वी जगमोहन डालमिया, शरद पवार, एन श्रीनिवासन यांनी आयसीसीचे अध्यक्षपद भुषवले आहे.

आयसीसीच्या एका अधिकाऱ्याने म्हटले की, 'आयसीसी अध्यक्ष ग्रेग बार्कले यांनी आयसीसीला आधीच सांगितलं आहे की, ते तिसऱ्यांदा निवडणूक लढवणार नाहीत. त्यांच्या कार्यकाळ संपल्यानंतर ते राजीनामा देणार आहेत. त्यांचा कार्यकाळ हा येत्या नोव्हेंबरमध्ये समाप्त होणार आहे. ग्रेग बार्कले यांनी २०२० मध्ये अध्यक्षांची जबाबदारी सांभाळली होती. त्यानंतर २०२२ मध्ये त्यांची पुन्हा एकदा अध्यक्ष पदासाठी नेमणूक करण्यात आली होती.

जय शहा यांनी आयसीसीचे अध्यक्ष होण्याची इच्छा व्यक्त केली होती. त्यामुळे ग्रेग बार्कले यांनी निवडणूक न लढवण्याचा निर्णय घेतला. यासह इंग्लंड आणि ऑस्ट्रेलियाकडून देखील जय शहा यांना समर्थन मिळत असल्याचं म्हटलं जात आहे. जय शहा यांना खरंच अध्यक्षपद मिळणार का? हे लवकरच कळेल. दरम्यान २७ ऑगस्ट ही नामांकन जाहीर करण्याची शेवटची तारीख असणार आहे.