Rahmanullah Gurbaz Breaks Sachin Tendulkar Record: अफगाणिस्तान आणि बांगलादेश या दोन्ही संघामध्ये वनडे मालिकेचा थरार सुरू आहे. या मालिकेतील तिसऱ्या सामन्यात अफगाणिस्तानने ५ गडी राखून शानदार विजय मिळवला. अफगाणिस्तानला विजय मिळवून देण्यात रहमानुल्लाह गुरबाजने मोलाची भूमिका बजावली.

मैदानाच्या चारही बाजूंना फटकेबाजी करत त्याने शानदार शतकी खेळी केली. या खेळीच्या बळावर त्याने आपल्या संघाला विजय मिळवून दिला. यासह अफगाणिस्तानने ही मालिका २-१ ने आपल्या नावावर केली. दरम्यान गुरबाजने शतकी खेळी करत मोठे रेकॉर्ड मोडून काढले आहेत.

हे रहमानुल्लाह गुरबाजच्या वनडे कारकिर्दीतील ८ वे शतक ठरले आहे. यासह तो वनडे क्रिकेटमध्ये ८ शतकं झळकावणारा आशियातील सर्वात युवा फलंदाज ठरला आहे. या रेकॉर्डमध्ये त्याने वयाच्या २२ व्या (२२ वर्ष ३४९ दिवस) वर्षी करून दाखवला आहे. यासह तो अफगाणिस्तानसाठी सर्वाधिक शतक झळकावणारा फलंदाज आहे.

सचिनला सोडलं मागे

तर मास्टर ब्लास्टर सचिन तेंडुलकरने हा रेकॉर्ड २२ वर्ष ३५७ दिवस इतकं वय असताना केला होता. तर भारताचा स्टार फलंदाज विराट कोहलीने हा रेकॉर्ड वय २३ वर्ष २७ दिवस असताना केला होता.

तर बाबर आझमने वय २३ वर्ष २८० दिवस असताना केला होता. या यादीत दक्षिण आफ्रिकेचा स्टार फलंदाज क्विंटन डी कॉक अव्वल स्थानी आहे. डी कॉकने वय २२ वर्ष ३१२ दिवस असताना वनडेत ८ शतकं झळकावली होती.

अफगाणिस्तानचा शानदार विजय

तसेच या सामन्याबद्दल बोलायचं झालं तर, बांगलादेशचा संघ प्रथम फलंदाजीसाठी मैदानात उतरला होता. प्रथम फलंदाजी करताना बांगलादेशला २४४ धावा करता आल्या. बांगलादेशकडून फलंदाजी करताना महमदुल्लाहने सर्वाधिक ९८ धावांची खेळी केली. यासह कर्णधार मेहदी हसनने ६६ धावा चोपल्या.

अफगाणिस्तानला हा सामना जिंकण्यासाठी २४५ धावा करायच्या होत्या. या धावांचा पाठलाग करताना अफगाणिस्तानकडून गुरबाजने शानदार शतकी खेळी केली. या खेळीच्या बळावर अफगाणिस्तानने ४९ व्या षटकात विजय मिळवला