भारतीय संघ बॉर्डर- गावसकर मालिकेसाठी ऑस्ट्रेलिया दौऱ्यावर आहे. या दौऱ्यावरील पहिल्याच कसोटीत भारतीय संघाने यजमानांना पराभवाची धूळ चारली. त्यानंतर ऑस्ट्रेलियन माध्यमांनी भारतीय खेळाडूंना टार्गेट करायला सुरुवात केली आहे.

खेळाडूंवर टीका करणं ठिक होतं. पण आता ऑस्ट्रेलियन माध्यमांनी आपलीच हद्द पार केली आहे. आधी विराट आणि आता रोहितला टार्गेट केलं गेलं आहे.

ऑस्ट्रेलियन माध्यमांकडून भारतीय खेळाडूंचा सातत्याने अपमान केला जातोय. विराट कोहली जेव्हा या मालिकेसाठी ऑस्ट्रेलियात आगमन झालं होतं, त्यावेळी विराटला किंगचं आगमन असा दर्जा देण्यात आला होता. मात्र मेलबर्न कसोटीतील पहिल्या डावात विराटने सॅम कॉन्टासला धक्का मारला. त्यानंतर, ऑस्ट्रेलियन माध्यमांनी विराटला टार्गेट करायला सुरुवात केली. मुख्य पेजवर त्याचा जोकर म्हणून उल्लेख करण्यात आला.

रोहितवर जोरदार टीका

मेलबर्नच्या मैदानावर सुरु असलेल्या चौथ्या कसोटीत भारतीय संघ बॅकफूटवर होता. मात्र आता भारतीय गोलंदाजांच्या शानदार गोलंदाजीच्या बळावर भारतीय संघाने दमदार कमबॅक केलं आहे. आजच्या वेस्ट ऑस्ट्रेलियन या वर्तमानपत्रात रोहितचा रडकं बाळ असा उल्लेख करण्यात आला आहे. यासह जोकर विराट कोहलीप्रमाणेच रोहित देखील भित्रा आहे, असं म्हटलं गेलं आहे.

या सामन्याबद्दल बोलायचं झालं, तर या सामन्यात ऑस्ट्रेलियाचा संघ पहिल्या डावात फलंदाजीसाठी आला होता. पहिल्या डावात फलंदाजी करताना, ऑस्ट्रेलियाने ४७४ धावांचा डोंगर उभारला. या धावांचा पाठलाग करण्यासाठी आलेल्या भारतीय संघाला ३६९ धावांपर्यंत मजल मारता आली.

भारतीय संघाकडून फलंदाजी करताना नितीश कुमार रेड्डीने सर्वाधिक ११४ धावांची खेळी केली. दुसऱ्या डावात फलंदाजीसाठी आलेल्या ऑस्ट्रेलियाने आतापर्यंत ९ गडी बाद २२८ धावा केल्या आहेत. तर ऑस्ट्रेलियाने दुसऱ्या डावात ३३३ धावांची मोठी आघाडी घेतली आहे.