India vs Afghanistan Asian Games 2023:

आशियाई क्रीडा स्पर्धेत भारतीय क्रिकेट संघाने इतिहास घडवला आहे. या स्पर्धेतील अंतिम सामना भारत आणि अफगाणिस्तान या दोन्ही संघांमध्ये पार पडला.या सामन्यात पावसाने हजेरी लावली. त्यामुळे सामना पूर्ण होऊ शकला नाही. दरम्यान रँकिंगमध्ये वरच्या क्रमांकावर असल्याने भारतीय संघाला सुवर्णपदक बहाल करण्यात आले आहे.

हांगझाऊच्या पिंगफेस स्टेडियमवर झालेल्या या सामन्यात भारतीय संघाने नाणेफेक जिंकून गोलंदाजी करण्याचा निर्णय घेतला होता. या सामन्यात नाणेफेक गमावून प्रथम फलंदाजीसाठी आलेल्या अफगाणिस्तान संघाने १८.२ षटकात ५ गडी बाद ११२ धावांपर्यंत मजल मारली होती. त्यानंतर पावसाचं आगमन झालं आणि सामनान थांबवावा लागला.

अफगाणिस्तान संघाच्या फलंदाजीबद्दल बोलायचं झालं तर,संघातील फलंदाजांना हवी तशी सुरुवात करता आली नव्हती. सामन्यातील दुसऱ्याच षटकात अफगाणिस्तानला पहिला धक्का बसला. सलामीवीर फलंदाज जुबैद अकबरी अवघ्या ५ धावा करत माघारी परतला. (Latest sports updates)

तिसऱ्या षटकातील शेवटच्या चेंडूवर अफगाणिस्तानला दुसरा धक्का बसला. संघातील अनुभवी फलंदाज अवघ्या ४ धावा करत माघारी परतला. अफगाणिस्तानचा संघ या धक्क्यातून सावरणार इतक्यात जदरान अवघी १ धाव करत माघारी परतला.

भारतीय महिला,पुरूष क्रिकेट संघाला सुवर्णपदक..

क्रिकेटमध्ये भारतीय पुरूष आणि महिला क्रिकेट संघाने सुवर्णपदकावर नाव कोरलं आहे. भारतीय महिला संघाने अंतिम सामन्यात श्रीलंकेला पराभूत करत सुवर्णपदकावर नाव कोरलं होतं. आता भारतीय संघाने देखील रँकिंगच्या जोराव सुवर्णपदक पटकावलं आहे.