अंबाती रायडू मागील काही दिवसांपासून चर्चेत आहे. रायडू आयपीएल २०२५ मध्ये समालोचक म्हणून काम करत आहे. समालोचन म्हणजेच कॉमेंट्री करताना तो सतत महेंद्रसिंह धोनीचे कौतुक करताना दिसला होता. चेन्नईचा सामना नसूनही नेहमी धोनी-धोनी करत असल्याने रायडूला ट्रोल केले जात आहे. याच दरम्यान रायडूचा इतर समालोचकांशी वाद झाल्याचे देखील पाहायला मिळाले.

काल गुजरात टायटन्स विरुद्ध राजस्थान रॉयल्स सामना सुरु होता. या सामन्यादरम्यान अंबाती रायडू, आकाश चोप्रा आणि वीरेंद्र सेहवाग कॉमेंट्री करत होते. त्यावेळेस आकाश चोप्राने परवाच्या पंजाब विरुद्ध चेन्नई या सामन्याचा उल्लेख केला. आकाश चोप्रा म्हणाला, 'अनकॅप्ट खेळाडूचा विषय निघाला आहे, (धोनीला उद्देशून) एक असाच झारखंडचा खेळाडू आहे, जो हॅलिकॉप्टर शॉट खेळतो. कालच्या सामन्यात त्यांनी दमदार बॅटिंग केली. पण थोडा उशीर झाला त्यांना यायला...'

त्यानंतर स्क्रीनवर महेंद्रसिंह धोनीचा व्हिडीओ प्ले झाला. तेव्हा अंबाती रायडू म्हणाला, 'हे पाहा आले आमचे थाला.. काय जबरदस्त खेळ केला त्यांनी कालच्या सामन्यात.. इन्टेंट घेऊनच मैदानात उतरले होते. कॉमेंट्री बॉक्समध्ये एनर्जी वाढत आहे सिक्स (छक्का) पाहून.. ते पाहा कव्हर्सच्या वर काय शॉट मारलाय. हा खेळाडू स्पेशल आहे वीरु पाजी..'

अंबाती रायडूची फिरकी घेत वीरेंद्र सेहवाग म्हणाला, 'हो तो खेळाडू स्पेशल आहेतच. पण तुम्ही म्हणालात एक युवा खेळाडू हॅलिकॉप्टर शॉट मारायचा. मी व्याकरण सुधारत आहे. तो शॉट मारतो' रायडू, सेहवाग आणि आकाश चोप्राचा कॉमेंट्री बॉक्समधील व्हिडीओ सोशल मीडियावर व्हायरल होत आहे. धोनीची पुन्हा स्तुती केल्याने अंबाती रायडूवर पुन्हा एकदा टीका होत आहे.