बँकेत नोकरी करण्याची इच्छा असणाऱ्या तरुणांसाठी नोकरीची सुवर्णसंधी आहे. युको बँकेत शिकाऊ पदांसाठी भरती करण्यात येणार आहे. युको ही देशातील सार्वजनिक क्षेत्रातील बँकामध्ये लोकप्रिय बँक आहे. युको बँकेने देशातील विविध राज्य आणि केंद्रशासित प्रदेशांमधील शाखांमध्ये शिकाऊ पदांसाठी भरती सुरु केली आहे. यासाठी बँकेने अधिसूचना जाहीर केली आहे.

युको बँकेने २ जुलै रोजी अधिसूचना जाहीर केली आहे. ५४४ उमेदवारांची भरती केली जाणार आहे. यात पश्चिम बंगाल, उत्तर प्रदेश आणि ओडिशासाठी जागा भरण्यात येणार आहे. पश्चिम बंगालमध्ये ८५ जागांसाठी भरती करण्यात येणार आहे. तर उत्तर प्रदेशसाठी ४७ जागा राखीव ठेवण्यात आल्या आहेत. तर ओडिशामध्ये ४४ जागांसाठी भरती करण्यात येणार आहे.

ज्या उमेदवारांना युको बँकेत अपरेंटिस पोस्टसाठी अर्ज करायचा आहे त्यांनी बँकेच्या अधिकृत वेबसाइटला भेट द्या. ucobank.com या वेबसाइटवरील लिंकवरुन तुम्ही याबाबतची सूचना पाहू शकतात. त्यानंतर वेबसाइटच्या मुखपृष्ठावर जाऊन अर्ज करु शकतात. या नोकरीसाठी अर्ज करण्याची शेवटची तारीख १४ जुलै आहे. त्यामुळे इच्छुक उमेदवारांनी १४ जुलैआधी अर्ज करणे गरजेचे आहे. महाराष्ट्रात एकूण ३१ जागांसाठी भरती करण्यात येणार आहे.

युको बँकेने प्रसिद्ध केलेल्या जाहिरातीनुसार,या भरतीसाठी अर्ज करणारा उमेदवार मान्यताप्राप्त विद्यापीठ किंवा इतर उच्च शिक्षण संस्थेतून पदवी प्राप्त असणे गरजेचे आहे. उमेदवाराचे वय २०-२८ वयोगटातील असावे. मागासवर्गीय प्रवर्गातील लोकांसाठी वयोमर्यादेत सूट दिली आहे.