उत्तर प्रदेशच्या गौतम बुद्ध नगरमधून धक्कादायक घटना समोर आली आहे. फटाके फोडताना केलेल्या एका चुकीने २० वर्षीय तरुणाचा मृत्यू झाल्याची घटना घडली. गौतम बुद्ध नगरच्या छिजारसी कॉलनीत ही घटना घडली. या घटनेने परिसरात खळबळ उडाली आहे.

तरुण स्टीलच्या ग्लासखाली सुतळी बॉम्ब फोडायला गेला. त्यावेळी स्टीलच्या ग्लासचे तुकडे झाले. हे तुकडे तरुणाच्या थेट शरीरात घुसले. या दुर्घटनेत गंभीर जखमी झालेल्या तरुणाला तातडीने रुग्णालयात दाखल करण्यात आलं. परंतु या तरुणाचा रुग्णालयात उपचारादरम्यान मृत्यू झाला.

पोलिसांनी दिलेल्या माहितीनुसार, गौतम बुद्ध नगरच्या नोएडा सेक्टर ६३ पोलीस स्टेशनच्या हद्दीतील छिजारसी कॉलनीत राहणाऱ्या २० वर्षीय तरुणाची यंदाची दिवाळी शेवटची ठरली. हा तरुण सुतळी बॉम्ब स्टीलच्या ग्लासखाली ठेवून फोडत होता. त्याचवेळी सुतळी बॉम्ब फुटल्याने स्टीलच्या ग्लासचे तुकडे झाले. त्यानंतर या ग्लासचे टोकदार तुकडे तरुणाच्या शरीराच्या विविध भागात घुसले.

या घटनेत गंभीर जखमी झालेल्या तरुणाला तातडीने नोएडा येथील फोर्टिस रुग्णालयात दाखल करण्यात आलं. मात्र, तरुणाचा मंगळवारी रुग्णालयात उपचारादरम्यान मृत्यू झाला. शिवा असे या तरुणाचे नाव आहे.

२० वर्षीय शिवा हा आई-वडील आणि बहिणीसोबत बिलाल मशिदीजवळील एका गल्लीत राहत होता. त्याचे वडील विनोद हे मूळचे पीलीभीत जिल्ह्यातील कंजा गावाचे रहिवासी आहेत. शिवाचे वडील आणि त्यांची आई खासगी कंपनीत काम करतात. ऐन दिवाळीत पदवीचं शिक्षण घेणाऱ्या शिवाचा मृत्यू झालाय. शिवाच्या मृत्यूमुळे हसत्या-खेळत्या कुटुंबावर दु:खाचा डोंगर कोसळला आहे.