Islamabad High Court ON Imran Khan Arrest : पाकिस्तानच्या राजकारणाला धक्कादायक वळण मिळालं आहे. मंगळवारी दुपारी इस्लामाबाद उच्च न्यायालयात (IHC) उपस्थित असलेले पीटीआय प्रमुख इम्रान खान यांना रेंजर्सनी कोर्ट परिसरातून ताब्यात घेतले आहे. पीटीआयचे वकील फैसल चौधरी यांनी या घडामोडींना दुजोरा दिला आहे. पाकिस्तानातील स्थानिक वृत्तपत्र डॉन डॉट कॉमने याबाबतचे वृत्त दिले आहे.

दरम्यान इस्लामाबाद हायकोर्टाचे मुख्य न्यायाधीश आमेर फारूक यांनी इस्लामाबादचे पोलीस प्रमुख अंतर्गत मंत्रालयाचे सचिव आणि अतिरिक्त ऍटर्नी जनरल यांना १५ मिनिटांत न्यायालयात हजर राहण्याचे निर्देश दिले. IHC मुख्य न्यायाधीश म्हणाले की ते "संयम" दाखवत आहे, परंतु इस्लामाबादचे पोलिस प्रमुख न्यायालयात हजर न झाल्यास पंतप्रधानांना "समन्स" बजावण्यात येईल असा इशाराही न्यायधीशांनी दिला आहे.

न्यायमूर्ती फारूख म्हणाले “न्यायालयात या आणि आम्हाला सांगा की इम्रानला का आणि कोणत्या प्रकरणात अटक करण्यात आली. दरम्यान इस्लामाबाद पोलिसांनी महानिरीक्षक (आयजी) अकबर नासिर खानच्या हवाल्याने एक निवेदन जारी केले आहेत. इम्रान यांना अल-कादिर ट्रस्ट प्रकरणात त्यांचे संबंध असल्याच्या संशयावरून अटक करण्यात आली असल्याचे म्हटले आहे.

पोलिस प्रमुखांनी सांगितले की इस्लामाबादमधील परिस्थिती "सामान्य" आहे. शहरात कलम 144 लागू करण्यात आले आहे आणि उल्लंघन करणार्‍यांवर कारवाई केली जाईल. रॉयटर्सच्या एका प्रत्यक्षदर्शीने सांगितले की, इम्रान खान यांनी IHC च्या गेटमध्ये प्रवेश केल्यानंतर काही वेळातच निमलष्करी दलाच्या तुकड्या आणि शस्रधारी कर्मचारी वाहन त्याच्या मागे घुसले. गेटवरच त्यांनी इम्रान खान यांना रोखले आणि कडक सुरक्षा असतानाही काही वेळातच त्यांनी त्यांना पळवून नेले. (Pakistan News)

पीटीआयचे नेते मुसरत चीमा यांनी ट्विटरवर एका व्हिडिओ संदेशात म्हटले की “ते सध्या इम्रान खानचा छळ करत आहेत, ते खान साहेबांना मारहाण करत आहेत. त्यांनी खान साहेबांसोबत काहीतरी केले आहे, असे आरोप देखील त्यांनी केले आहे. पीटीआयच्या अधिकृत ट्विटर अकाऊंटने इम्रानच्या वकिलाचा व्हिडिओही शेअर केला आहे. यात ते आयएचसीच्या बाहेर “अतिशय जखमी” झाल्याचे म्हटले आहे. (Latest Marathi News)