पाकिस्तानमधील बलुचिस्तानमध्ये एका हिंदू मुलीची सहाय्यक आयुक्त पदावर नियु्क्ती झाली आहे.एका हिंदू मुलीने हे यश मिळवून इतिहास रचला आहे. कशिश चौधरी या २५ वर्षीय मुलीने हा इतिहास रचला आहे. त्या आता बलुचिस्तानमध्ये पहिल्या हिंदू सहाय्यक आयुक्त बनल्या आहेत. त्यांची ही कामगिरी संपूर्ण देशासाठी अभिमानाची गोष्ट आहे. तेथील हिंदू महिलांच्या शिक्षणाबद्दल आणि कामगिरीबद्दलचा उत्तम संदेश आहे.

एका रिपोर्टनुसार, कशिश चौधरी यांचा जन्म पाकिस्तानमधील बलुचिस्तान प्रांतातील चगाई जिल्ह्यातील नोशकी शहरात झाला. हा भाग खूप मागासलेला आणि दुर्गम आहे. तरीही कशिशने या परिस्थित तिथे अभ्यास केला. आणि शिक्षण क्षेत्रात नवीन क्रांती घडवून आणण्यासाठी प्रयत्न केले.

कशिश चौधरी यांनी बलुचिस्तान लोकसेवा आयोग (BPSC) परीक्षा उत्तीर्ण केली आहे. त्या आता सहाय्यक आयुक्त म्हणून काम करतील. कशिश यांच्या या कामगिरीने त्यांच्या कुटुंबियांना खूप आनंद झाला आहे.

कशिश यांनी क्वेटा येथे बलुचिस्तानचे मुख्यमंत्री सरफराज बगाती यांची भेट घेतली. यावेळी त्या महिला व अल्पसंख्यांकाच्या हक्कांसाठी आणि प्रांताच्या विकासासाठी काम करतील, असं सांगितलं. महिलांना सक्षम बनवणे आणि समान अधिकार देणे हे त्यांचे प्राधान्य असेल.

कशिश यांचा प्रवास

कशिश यांचे वडील गिरधारी लाल यांचा त्यांच्या यशात खूप मोठा वाटा आहे. ते मध्यमवर्गीय व्यापारी आहेत.मुलीला उच्च शिक्षण घेण्यासाठी त्यांनी नेहमी प्रोत्साहन दिले.कशिश यांची ही कामगिरी पाकिस्तानमधील सर्व हिंदू महिलांसाठी मोलाची आहे.