'घर फिरले की घराचे वासेही फिरतात' अशी म्हण तुम्ही वाचली असेल किंवा कोणाला उदाहरण कोणाला सांगितलं असेल. राजकीय वर्तुळात ही म्हण पश्चिम बंगालमधील तृणमूल काँग्रेसला अगदी तंतोतंत लागू होते. विधानसभा निवडणुकीत पराभव होताच टीएमसीचे एक-एक आमदार,नगरसेवक पक्षातून बाहेर पडू लागले आहेत. आता टीएमसी खासदार सुद्धा पक्षातून बाहेर पडणार असल्याची शक्यता आहे. जवळपास २० खासदार पक्षाला रामराम ठोकणार असल्याची चर्चा राज्यातील वर्तुळात सुरू आहे.

पश्चिम बंगाल विधानसभा निवडणुकीतील पराभवानंत ममता बॅनर्जी यांच्या नेतृत्वाखालील तृणमूल काँग्रेसला एकापाठोपाठ एक धक्के बसत आहेत. आता टीएमसीच्या आमदारांनी पुकारलेल्या बंडामुळे खासदारांमध्ये उडाली असून जवळपास २० खासदार पक्षाला रामराम ठोकण्याच्या तयारीत आहेत. सूत्रांनी दिलेल्या माहितीनुसार या संदर्भात उच्च स्तरावर चर्चा सुरू असून खासदारांनी निष्ठेला मुठमाती देत पक्ष बदलण्याच्या निर्णयावर एकमत करण्याचा निर्धार केला आहे.

ममता बॅनर्जी यांना मोठा धक्का

संसदेच्या दोन्ही सभागृहांमध्ये तृणमूल काँग्रेसचे एकूण ४१ खासदार आहेत. यामध्ये लोकसभेतील २८ आणि राज्यसभेतील १३ खासदारांचा समावेश आहे. जर २० खासदारांनी टीएमसी सोडली, तर विधानसभा निवडणुकीतील पराभवानंतर पक्षातच बंडखोरीला सामोरे जाणाऱ्या ममता बॅनर्जी यांना हा आणखी एक मोठा धक्का असेन.

जर टीएमसीच्या खासदारांच्या गटात फूट पडली तर ही ममता बॅनर्जी यांचा हा मोठा पराभव असण्याची शक्यता आहे. कारण विरोधी पक्षामध्ये दुसरा मोठा पक्ष आहे. जर येथे बंडखोरी झाली तर टीएमसी आणि विरोधी पक्ष खूप कमकुवत होईल.

मात्र, बंगालमधील तृणमूल काँग्रेस (टीएमसी) विधिमंडळ पक्षात आधीच दोन गट पडले आहेत. आमदार ऋतब्रता बॅनर्जी यांच्या नेतृत्वाखालील ६० आमदारांच्या एका बंडखोर गटाने स्वतःलाच खरी तृणमूल काँग्रेस म्हणून घोषित केले आहे. या गटाने ऋतब्रत बॅनर्जी यांची विरोधी पक्षनेतेपदी नियुक्ती केली आहे. त्याला अध्यक्षांची मंजुरीही मिळवली आहे. या गटाने ममता बॅनर्जी यांच्या विरोधात उघडपणे बंड केले असून, विधानसभेत विरोधी पक्षनेते म्हणून त्यांच्या निवडीला आव्हान दिले आहे.