today weather forecast in India : देशात सध्या थंडीची लाट पसरली आहे. कमान अन् किमान तापमानात मोठी घट झाली आहे. दिल्ली, राजस्थान, महाराष्ट्रासह देशात थंडीची लाट पसरली आहे. जम्मू काश्मीर ते दिल्ली अन् राजस्थान ते कोलकाता अन् केरळमध्येही हाडं गोठवणारी थंडी पडलेय. पण हुडहुडीच्या वातवारणातच हवामान विभागाकडून पावसाचा अलर्ट जारी करण्यात आला आहे. पाच राज्यात पावसाची शक्यता वर्तवण्यात आली आहे. त्याशिवाय १८ शहरात सकाळी आणि संध्याकाळी दाट धुके पडू शकते, असा अंदाज वर्तवण्यात आलाय. महाराष्ट्रात मात्र कमाल अन् किमान तापमानात घट झाल्याने गारवा वाढलाय. पहाटे कडाक्याची थंडी वाजत आहे. दरम्यान, हवामान खात्याने पाच राज्यांमध्ये मध्यम ते मुसळधार पावसाचा इशारा दिला आहे.

हवामान खात्याच्या अंदाजानुसार, जम्मू आणि काश्मीर, तामिळनाडू, पुद्दुचेरी, केरळ आणि अंदमान आणि निकोबार बेटांवर आज पावसाची शक्यता आहे. या ठिकामी मध्यम ते मुसळधार पावसाचा इशारा देण्यात आला आहे. वेगात हवा, वादळे आणि विजांचा कडकडाट होण्याचीही शक्यता आहे. अंदमान आणि निकोबार बेटांवर ताशी ३० ते ४० किलोमीटर वेगाने वारे वाहण्याची शक्यता असल्याचे हवामान विभागाने म्हटलेय.

देशात थंडीची लाट आली आहे, काही शहरात दाट धुक्याचा इशारा देण्यात आला आहे. धुक्यामध्ये वाहने जपून चालवण्याची सूचनाही प्रशासनाकडून देण्यात आली आहे. धुक्यामुळेच यमुना एक्सप्रेसवेवर मंगळवारी भयंकर दुर्घटना घडली होती. त्यामध्ये १५ जणांचा मृत्यू झाला होता. पुढील काही दिवसा १८ शहरांमध्ये दाट धुके पडण्याची शक्यता वर्तवण्यात आली आहे. बिहारमधील पाटणा, भागलपूर, पूर्णिया, गया, जहानाबाद आणि दरभंगा येथे दाट धुक्याचा इशारा देण्यात आला आहे. उत्तर प्रदेशातील प्रयागराज, कानपूर, लखनऊ, इटावा, बाराबंकी आणि सहारनपूर येथेही सकाळ अन् सायंकाळच्या वेळी दाट धुके पडू शकते. दरम्यान, हिमाचल प्रदेशातील शिमला आणि मनाली येथील लोकांना दाट धुक्यापासून सावध राहण्याचा सल्ला देण्यात आला आहे. हरियाणातील गुरुग्राममध्ये दाट धुक्याची शक्यता वर्तवण्यात आली आहे.

राज्यात सध्या थंडीची लाट ओसरली आहे. पण हवामानात गारवा कायम असल्याने हुडहुडी तशीच आहे. उत्तरेकडून येणाऱ्या शीत लहरी काही प्रमाणात कमी झाल्याने महाराष्ट्रातही थंडीचा कडाका काहीसा कमी झाला आहे. राज्यातील अनेक जिल्ह्यात किमान तापमानात चढ-उतार पाहायला मिळतोय. राज्यभरात गारठा आणखी काही दिवस कायम राहणार असल्याची शक्यता वर्तवण्यात आली आहे. गोंदिया, अहिल्यानगर आणि जळगाव मध्ये ८.५ अंश डिग्री सेल्सिअस तापमानाची नोंद झाली आहे.

• अहिल्यानगर: ८.५

• पुणे: ९.४

• जळगाव: ८.५

• कोल्हापूर: १५.१

• महाबळेश्वर: १२.१

• मालेगाव: ९.२

• नाशिक: ८.८

• सांगली: १४.८

• सातारा: १३.५

• सोलापूर: १४.९

• छत्रपती संभाजीनगर: १०.९

• परभणी: ११.३

• अकोला: ११.०

• अमरावती: ११.३

• बुलढाणा: १२.३

• गोंदिया: ८.५

• नागपूर: ९.६

• वर्धा: १०.८

• यवतमाळ: १०