व्हिएतनाममधील फू क्वोक बेटाजवळ आज भारतीय पर्यटकांना घेऊन जाणारी एक बोट उलटल्याची दुर्दैवी घटना घडली आहे. या घटनेनंतर स्थानिक प्रशासनाकडून शोध आणि बचावकार्य सुरू असल्याची माहिती व्हिएतनाममधील भारतीय दुतावासाने दिली आहे. मिळालेल्या माहितीनुसार या बोटीमध्ये 33 प्रवासी होते.

दूतावासाने प्रसिद्ध केलेल्या निवेदनात म्हटले आहे की, फू क्वोक बेटाजवळ काही भारतीय पर्यटकांना घेऊन जाणारी बोट काही तासांपूर्वी उलटल्याची दुर्दैवी घटना घडली आहे.या घटनेबाबतची सविस्तर माहिती अद्याप समोर आलेली नसून स्थानिक प्रशासनाकडून शोध व बचावकार्य सुरू आहे, असेही दूतावासाने स्पष्ट केले आहे.

दरम्यान,कुटुंबांना मदत आणि माहिती देण्यासाठी भारतीय दूतावासाने तातडीने पावले उचलली आहेत. हो ची मिन्ह सिटी येथील भारतीय वाणिज्य दूतावासात एक नियंत्रण कक्ष (कंट्रोल रूम) स्थापन करण्यात आला आहे. तसेच हनोई येथेही आणखी एक नियंत्रण कक्ष सुरू करण्यात आला आहे.या नियंत्रण कक्षांमार्फत घटनेबाबत माहिती देणे आणि या कुटुंबांना आवश्यक ती मदत पुरवली जाणार असल्याचे दूतावासाने सांगितले आहे.