उत्तर प्रदेशातील मेरठमध्ये शनिवारी संध्याकाळी एक मोठी दुर्घटना घडली आहे. येथील लोहिया नगर पोलीस स्टेशन हद्दीतील झाकीर कॉलनीत तीन मजली घर अचानक कोसळल्याची घटना घडली आहे. यामुळे एकाच कुटुंबातील 10 हून अधिक लोक ढिगाऱ्याखाली अडकले आहेत.

या घटनेची माहिती मिळताच घटनास्थळी स्थानिक पोलीस आणि बचाव पथक दाखल झालं. यानंतर तात्काळ. बचावकार्य सुरू करण्यात आले. यादरम्यान तीन लोकांना ढिगाऱ्याखालून बाहेर काढण्यात आलं. एनडीआरएफनेही संध्याकाळी 7.30 च्या सुमारास आपले ऑपरेशन सुरू केले. मात्र या दुर्घटनेत एकाच मृत्यू झाला आहे. साजिद, असं मृत व्यक्तीचे नाव असल्याचं सांगण्यात येत आहे.

झाकीर कॉलनीतील मदिना मशिदीपासून सुमारे 100 मीटर अंतरावर साजिद यांचं घर आहे. या घरात साजिद, त्याची आई नफ्फो, पत्नी सायमा, भाऊ आबिद, गोविंदा, शाकीर, नदीम आणि त्यांचे कुटुंब राहतात. घराचा एक भाग गवताच्या छताने झाकून एक डेअरी बांधली आहे, तर उर्वरित तीन मजली घरात कुटुंब राहत आहे.

शनिवारी सायंकाळी पाच वाजण्याच्या सुमारास साजिद यांचं घर अचानक कोसळलं. घराच्या ढिगाऱ्याखाली साजिदसह कुटुंबातील 12 जण अडकले. घर कोसळल्यावर मोठा आवाज झाला. हा आवाज ऐकू येताच आजूबाजूच्या लोकांनी घटनास्थळी धाव घेतली.

घर कोसळल्याची माहिती मिळताच पोलीस आणि प्रशासकीय अधिकाऱ्यांनी घटनास्थळी धाव घेतली. एडीजी ध्रुवकांत ठाकूर, आयुक्त सेल्वा कुमारी जे, आयजी नचिकेता झा, एसएसपी डॉ. विपिन टाडा आणि इतर अधिकारी घटनास्थळी पोहोचले. नईम, नदीम आणि अन्य एकाला ढिगाऱ्याखालून बाहेर काढण्यात आले आहे. अद्यापही बचाव कार्य सुरू आहे.