उत्तर प्रदेशातील अमरोहा येथे रविवारी रात्री उशिरा घडलेल्या एका ह्रदयद्रावक घटनेने संपूर्ण परिसरात शोककळा पसरली आहे. २३ दिवसांच्या एका नवजात बाळाचा पलंगावर झोपताना गुदमरून मृत्यू झाला आहे. रिपोर्टनुसार, बाळ आपल्या पालकांसोबत झोपला होता. मात्र, झोपेतच कुणाचा तरी हात किंवा शरीराचा काही भाग नवजात बाळाच्या अंगावर पडला. यामुळे बाळाचा श्वास रोखला गेला आणि त्याचा दुर्दैवी मृत्यू झाला.

दुसऱ्या दिवशी बाळाला मृतावस्थेत पाहून आईला जबर धक्का बसला. त्यांनी तातडीने बाळाला रूग्णालयात नेलं. मात्र, डॉक्टरांनी तपासून मुलाला मृत घोषित केलं. पती आणि पत्नीनं रूग्णालयात एकच टाहो फोडला. दरम्यान, रूग्णालयातच पती आणि पत्नीने एकमेकांवर निष्काळजीपणाचा गंभीर आरोप केला. तसेच भांडणे देखील सुरू केली.

मिळालेल्या माहितीनुसार, हे परिवार अमरोहाच्या गजरौला परिसरातील सिहाली जागीर गावात वास्तव्यास होते. लग्न झाल्याच्या ४ वर्षांनंतर या जोडप्याला मुल झाले होते. मात्र, अवघ्या २३ दिवसांनंतर बाळाचा दुर्देवी मृत्यू झाला. या दुर्देवी घटनेनंतर संपूर्ण परिसर हादरून गेला आहे. हा दुर्देवी घटनेनंतर, कुटुंब असह्य झाले आहे. आई आणि तिच्या मुलाचे कपडे आणि खेळणी पाहून वारंवार अश्रू ढाळते आहे.

सीएचसी प्रभारी यांच्या मते, प्राथमिक तपासात नवजात बाळाचा मृत्यू गुदमरल्यामुळे झाल्याचे उघड झाले. त्यांनी असेही सांगितले की, कुटुंबाने कुणाविरूद्धही तक्रार दाखल केली नाही, त्यामुळे कोणतीही कायदेशीर कारवाई करण्यात आली नाही. या घटनेनंतर ग्रामस्थांकडून शोक व्यक्त केला जात आहे.