Uttar Pradesh Highway Crash Five Killed : उत्तर प्रदेशमध्ये एका भरधाव कारने ८ जणांना चिरडल्याची घटना घडली आहे. आग्रामधील महामार्गावर झालेल्या भीषण अपघातात पाच जणांचा मृत्यू झाला आहे. पोलिसांनी याप्रकरणी कार चालकाला अटक केली आहे. चालकाची वैद्यकीय तपासणी कऱण्यात येत असून त्याच्यावर गुन्हा दाखल करण्यात आला आहे. अपघातानंतर महामार्गावर मोठ्या प्रमाणात वाहतूक कोंडी झाली होती.

शुक्रवारी एका भरधाव कारने दुचाकीसह रस्त्यावर चालणाऱ्या अनेकांना चिरडले. या दुर्दैवी अपघातामध्ये पाच जणांचा जागेवरच मृत्यू झाला आहे. तर तीन जणांची प्रकृती गंभीर आहे. त्यांच्यावर जवळच्या रूग्णालयात उपचार सुरू आहेत. टाटा नेक्सन कारने शुक्रवारी रात्री महामार्गावर अनेकांना चिरडले. कारने एका घराबाहेर बसलेल्या लोकांना जोरदार टक्कर दिली, त्याशिवाय दुचाकीलाही उडवले.

जमावाची चालकाला बेदम मारहाण -

या भीषण अपघातात ८ जण जखमी झाल्याची माहिती आहे. त्यांना गंभीर अवस्थेत एसएन मेडिकल कॉलेजमध्ये दाखल करण्यात आले. उपचारावेळी पाच जणांचा मृत्यू झाला. तर तीन जणांवर उपचार सुरू असून त्यांची प्रकृती गंभीर असल्याचे वृत्त आहे. अपघाताची माहिती मिळताच शेकडो लोकांचा जमाव जमला. त्यांनतर कार चालकाला बेदम मारहाण झाली. पोलिसांनी तात्काळ घटनास्थळी धाव घेत जमावाला पांगवले अन् चालकाला अटक केली.

मुख्यमंत्री काय म्हणाले ?

आग्रा येथील नागला बुधी येथे झालेल्या अपघाताबद्दल मुख्यमंत्री योगी आदित्यनाथ यांनी दुःख व्यक्त केले. योगी आदित्यनाथ यांनी मृतांच्या कुटुंबियांबद्दल शोक व्यक्त केला आहे. जखमींवर त्वरित उपचार करण्याचे त्यांनी निर्देश दिले. आग्रा पोलिसांनी पाच जणांच्या मृत्यूची माहिती दिली आहे. मुख्यमंत्री योगी आदित्यनाथ यांनी घटनेची दखल घेतली आहे आणि जिल्हा प्रशासनाला जखमींना सर्वोत्तम उपचार देण्याचे निर्देश दिले आहेत.