ग्रेटर नोएडाच्या दादरी पोलीस ठाण्याच्या हद्दीतील रूपवास गावाजवळ आज सकाळी एक भीषण रस्ते अपघात झाला. भरधाव वेगाने जाणाऱ्या बसने समोरून येणाऱ्या दुसऱ्या स्कूल बसला धडक दिली. या दुर्घटनेत जवळपास १२ विद्यार्थी जखमी झालेत. त्यांना जवळच्या रुग्णालयात दाखल करण्यात आले आहे. मिळालेल्या माहितीनुसार, बस चालकाच्या डोक्याला गंभीर दुखापत झाली आहे.

मिळालेल्या माहितीनुसार, हा अपघात रूपवास गावाजवळील अमका रोडवर सकाळी ७ वाजण्याच्या सुमारास झाला. रामाज्ञा शाळेची असल्याचे मानली जाणारी एक बस भरधाव वेगात होती. याचदरम्यान चालकाचे बसच्या स्टेरिंगवरील नियंत्रण सुटले आणि समोरून येणाऱ्या जीझस मेरी स्कूलच्या बसला धडकली. ही धडक इतकी जोरदार होती की दोन्ही बसेसच्या पुढील भागाचे मोठे नुकसान झाले. घटनेच्या वेळी जीझस मेरी स्कूलच्या बसमध्ये सुमारे २५ मुले होती. तर अनिंयत्रित झालेली दुसरी बस ही रिकामी होती.

अपघातानंतर मुलांचा रडण्याचा आवाज ऐकून लोक घटनास्थळी धावून आले. स्थानिकांनी तात्काळ बचावकार्य सुरू केले, त्यानंतर नागरिकांनी पोलिसांना माहिती दिली. पोलीस घटनास्थळी पोहोचले आणि स्थानिक रहिवाशांच्या मदतीने सर्व जखमींना जवळच्या रुग्णालयात दाखल केले. चालक बसच्या केबिनमध्ये अडकला होता, त्या मोठ्या प्रयत्नांनंतर बाहेर काढण्यात आले.

डॉक्टरांनी दिलेल्या अहवालानुसार, बहुतेक मुलांना किरकोळ दुखापत झाली आहे, परंतु डोक्याला गंभीर दुखापत झाल्यामुळे काहींना निरीक्षणाखाली ठेवण्यात आले असून त्यांच्यावर उपचार सुरू आहेत. तर अपघातात बस चालक गंभीर जखमी झाला आहे. त्याच्या डोक्याला गंभीर दुखापत झाली आहे. त्याला आयसीयूमध्ये दाखल करण्यात आले आहे. डॉक्टरांच्या मते त्याची प्रकृती चिंताजनक आहे.