इराण आणि अमेरिका यांच्यातील तणाव काही संपायचं नाव घेत नाहीये. कतारची राजधानी दोहामध्ये दोन्ही देशांत युद्धबंदीसाठी उच्चस्तरीय राजनैतिक वाटाघाटी सुरू असतानाच अमेरिकेनं इराणवर हवाई हल्ले केले आहेत. त्यामुळे आखातातील युद्ध पुन्हा भडकण्याची भीती व्यक्त केली जातेय. इतकंच नव्हे तर अमेरिकेवर हवाई हल्ल्यानंतर इराणनं पुन्हा एकदा युद्धाची तयारी केल्याची चर्चा रंगू लागलीये. अमेरिकेनं इराणवर नेमकी काय कारवाई केलीये पाहूयात...

अमेरिकेनं दक्षिण इराणमधील 'बंदर अब्बास' या मुख्य नौदल तळाजवळ भीषण हवाई हल्ले केले. इराणमधील क्षेपणास्त्र प्रक्षेपण तळ, सागरी मार्गात स्फोटके ठेवणाऱ्या बोटी यांसह अनेक ठिकाणी स्वसंरक्षणार्थ हल्ले केल्याची माहिती अमेरिकेनं दिलीये. या हल्ल्यांमध्ये बोटींवरील इराणचे चार सैनिक ठार झाल्याची माहिती समोर आलीये.

हवाई हल्ल्यांदरम्यान अमेरिकेचं 'एमक्यू-९ रीपर' ड्रोन पाडल्याचा दावा इराणनं केलाय. एकीकडे, इराणसोबत तात्पुरता युद्धविराम झालेला असतानाही, अमेरिकेनं इस्रायलमधील आपलं लष्कर कमी केलेलं नाहीये. तर दुसरीकडे, लष्करी सज्जता आणि मुस्लिम देशांना एकत्र आणण्याची खेळी इराणनं खेळलीये. या दोन्ही देशांतील कुरघोडीमुळे जगाची इंधन कोंडी झाली असताना आता मात्र कतारमध्ये सुरू झालेल्या चर्चेत अमेरिका इराणची सागरी नाकेबंदी हटवण्यास तयार झालीये. तर या बदल्यात इराण होर्मुझ जलमार्ग खुला करणार आहे. या सामंजस्य करारावर आता दोन्ही देश कशी अंमलबजावणी करतात याकडे जगाचं लक्ष लागलंय...