Turkey, Syria Earthquake: तुर्कस्तान आणि सीरियामध्ये सोमवारी 6 फेब्रुवारी रोजी झालेल्या भूकंपामुळे प्रचंड हाहाकार उडाला आहे.मृतांची संख्या सातत्याने वाढत आहे. रॉयटर्सच्या माहितीनुसार, या भूकंपात आतापर्यंत 7800 हून अधिक लोकांचा मृत्यू झाला आहे.

अजूनही हजारो लोक ढिगाऱ्याखाली दबल्याची भीती व्यक्त करण्यात येत आहे. तुर्की आणि सीरियामधील रुग्णालये जखमींनी भरून गेली आहेत. अजूनही हजारो लोक बेपत्ता आहेत. प्रशासनाकडून सातत्याने बचावकार्य सुरू आहे.

तुर्कीच्या आपत्ती व्यवस्थापन विभागाने सांगितले की, 6 फेब्रुवारी रोजी आलेल्या 7.7 तीव्रतेच्या  भूकंपानंतर आतापर्यंत एकूण 435 भूकंपांची नोंद झाली आहे. ते म्हणाले की, भूकंपानंतर मदत आणि बचाव कार्यासाठी आतापर्यंत एकूण 60,217 कर्मचारी आणि 4,746 वाहने आणि बांधकाम उपकरणे तैनात करण्यात आली आहेत.

तुर्कस्तानमध्ये झालेल्या भूकंपानंतर जगभरातील देशांनी मदतीचा हात पुढे केला आहे. जवळपास 70 देशांच्या टीम मदत आणि बचाव कार्यासाठी तुर्कस्तानमध्ये पोहोचली आहे. पण तुर्कस्तानचे खराब हवामान मदत आणि बचावासाठी अडथळा ठरत आहे.

भारताकडून मदतीचा हात

तुर्कस्तानमधील भूकंपानंतर भारतानेही तुर्कस्तानला मदतीचा हात पुढे केला आहे. भारताने मदत साहित्य, उपकरणे आणि लष्करी जवानांची चार सी-17 विमाने पाठवली आहेत. यासोबतच 108 टनांपेक्षा जास्त वजनाची मदत पॅकेज तुर्कीला पाठवण्यात आली आहे.