Uttarakhand Chamoli Train Accident : मजूरांना घेऊन जाणारी लोको ट्रोनने बोगद्यात मालगाडीला जोरात धडक दिल्याची घटना उत्तराखंडमध्ये घडली आहे. चमोली जिल्ह्यातील विष्णुगड-पिपलकोटी जलविद्युत प्रकल्पाच्या पिपलकोटी बोगद्यात मंगळवारी संध्याकाळी उशिरा ही दुर्दैवी घटना घडली. या अपघातामध्ये ५० कामगार जखमी झाले आहेत.

मंगळवारी संध्याकाळी लोको ट्रेन कामगार आणि अधिकाऱ्यांना पिपलकोटी बोगद्यात घेऊन निघाली होती. त्याचवेळी मालगाडीला जोरात धडकली. त्यामुळे ६० जण जखमी झाले आहेत. अपघाताची माहिती मिळताच रेल्वे पोलिसांनी घटनास्थळी धाव घेतली. जखमी मजूरांना जवळच्या रूग्णालयात उपचारासाठी दाखल करण्यात आले आहे.

चमोलीमध्ये मंगळवारी संध्याकाळी उशिरा झालेल्या अपघातावेळी ट्रेनमध्ये एकूण १०९ लोक होते. त्यापैकी ६० जण जखमी झाले आहेत. सर्व लोकांना वाचवण्यात आले आहे. सर्व जखमींना उपचारासाठी रूग्णालयात दाखल करण्यात आले आहे. जखमींची प्रकृती सध्या स्थिर आहे, अशी माहिती चमोलीमधील जिल्हा अधिकारी गौरव कुमार यांनी प्रसारमाध्यमांना सांगितले.

टीएचडीसीद्वारे बांधलेल्या प्रकल्पाच्या पिपलकोटी बोगद्यात एक ट्रेन प्रवाशांना घेऊन जात होती. दुसऱ्या बाजूला मालगाडी येत होती. त्यावेळी या दोन्ही ट्रेनची धडक झाली, असे जिल्हाधिकाऱ्यांनी सांगितले. दरम्यान, कामगार, अधिकारी आणि बांधकाम कामासाठी लागणारे साहित्य वाहून नेण्यासाठी बोगद्यांच्या आत लोको ट्रेनचा वापर केला जातो. पण मंगळवारी संध्याकाळी मालगाडीसोबत लोको ट्रेनची जोरात धडक झाली.

अपघातामधील जखमींना उपचारासाठी जवळच्या वेगवेगळ्या रूग्णालयात उपचारासठी दाखल करण्यात आलेय. गोपेश्वर जिल्हा रुग्णालयात ४२ जखमी कामगारांवर उपचार सुरू आहेत. तर १७ जणांवर पिपलकोटी येथील विवेकानंद रुग्णालयात उपचार सुरू आहेत. सध्या सर्व जखमी कामगारांची प्रकृती स्थिर आहे. चमोली जिल्ह्यातील हेलांग आणि पिपलकोटी दरम्यान अलकनंदा नदीवर ४४४ मेगावॅटचा हा जलविद्युत प्रकल्प बांधला जात आहे. या प्रकल्पातून चार टर्बाइनद्वारे १११ मेगावॅट वीज निर्मिती केली जाईल. पुढील वर्षांपर्यंत प्रकल्प पूर्ण करायचा आहे. त्यामुळे काम जोरात सुरू आहे. पण मंगळवारी सायंकाळी सुदैवाने मोठी दुर्घटना टळली.