मध्य प्रदेशच्या कटनी जिल्ह्यात शनिवारी रात्री भीषण अपघात झाला. भरधाव कारने ऑटो रिक्षाला धडक दिली. त्यानंतर कार थेट तलावात कोसळली. यात भाजप युवा मोर्चाचे युवा नेते आणि त्याचा मित्राचा अपघाती मृत्यू झाला.

पोलीस अधिकाऱ्याने रविवारी ही अपघाताची माहिती दिली. अधिकाऱ्याने सांगितलं की, जिल्हा मुख्यालयाच्या जवळ २२ किलोमीटरपासून लांब लक्ष्मण सागर तलावाजवळ शनिवारी रात्री साडेअकरा वाजता अपघात झाला. कारमधील दोघांनी तलावातील पाण्यात पोहत किनाऱ्यावर येऊन जीव वाचवला.

पोलीस ठाण्याचे प्रभारी आरपी मिश्रा यांनी सांगितलं की, भाजप युवा मोर्चाचे बिलहरि मंडळाचे अध्यक्ष प्रशांत नायक हे त्यांचे मित्र विकास तिवारी, अभिषेक चौरसिया आणि अमन ताम्रकर यांच्यासोबत घरी जात होते. त्याचवेळी त्यांच्या कारच्या चालकाचं वाहनावरील नियंत्रण सुटलं. त्यामुळे भीषण अपघात झाला.

भाजप नेत्याची कार रिक्षाला धडकून तलावात कोसळली. या घटनेत दोघांचा मृत्यू झाला. तर कारमधील दोघांनी पोहून जीव वाचवला. प्रशांत नायक आणि विकास तिवारी यांचा मृत्यू झाला. तर चौरसिया आणि ताम्रकर यांनी स्वत:चा जीव वाचवला.

अपघातानंतर नेमकं काय घडलं?

कार तलावात कोसळताना चौरसियाने कारचा दरवाजा उघडला. त्यानंतर त्याने तलावात उडी मारली. चौरसियानंतर त्याच्या बाजूला बसलेल्या ताम्रकरनेही तलावात उडी मारली. चौरसियाने नायक आणि तिवारीला वाचवण्याचा प्रयत्न केला. पण वेळेत दरावाजा न उघडल्याने त्यांचा मृत्यू झाला.