तमिळनाडू सरकारने नवजात बालकांसाठी राबविण्यात येणाऱ्या थाई मामन सुवर्ण अंगठी योजना’ अंतर्गत सोन्याच्या अंगठ्या खरेदी करण्यासाठी जॉय अलुक्कास आणि कल्याण ज्वेलर्स या दोन सोन्याच्या कंपन्यांना काम दिले आहेत. माजी मुख्यमंत्री सी. एन. अण्णादुराई यांच्या जयंतीनिमित्त 15 सप्टेंबर रोजी या योजनेचा शुभारंभ करण्यात येणार आहे. सरकारने दिलेल्या माहितीनुसार, तमिळनाडू मेडिकल सर्व्हिसेस कॉर्पोरेशनने (TNMSC) जून ते सप्टेंबर या कालावधीतील लाभार्थ्यांसाठी आवश्यक असलेल्या 1 लाख 28 हजार 499 सोन्याच्या अंगठ्यांच्या पुरवठ्यासाठी जॉय अलुक्कास आणि कल्याण ज्वेलर्स यांना अनुक्रमे 70:30 या प्रमाणात कार्यादेश दिले आहेत.

मुख्यमंत्री विजय थलपथी यांनी निवडणुकीपूर्वी केली होती घोषणा

मुख्यमंत्री विजय थलपथी यांनी एप्रिलमध्ये झालेल्या विधानसभा निवडणुकीपूर्वी ही योजना सुरू करणार असल्याचे आश्वासन दिले होते. याची पूर्तता त्यांनी आज केली असून सरकारी रुग्णालयांमध्ये जन्मलेल्या नवजात बालकांना या योजनेचा लाभ मिळणार असून, सरकारी वैद्यकीय संस्थांमध्ये प्रसूतीला प्रोत्साहन देणे हा योजनेचा मुख्य उद्देश आहे. सरकारच्या निवेदनानुसार, प्रत्येकी एक ग्रॅम वजनाच्या तब्बल 4 लाख 41 हजार 667 सोन्याच्या अंगठ्या उपलब्ध करून देण्यासंदर्भात सरकारने प्रसिद्ध पत्रक काढले होते. त्यानंतर 14 जुलै रोजी TNMSC ने निविदा प्रक्रिया सुरू केली होती. या निविदेत 11 कंपन्यांनी सहभाग घेतला आणि टीएन टेंडर्स पोर्टलद्वारे आपल्या दरांचा तपशील सादर केला.

जॉय अलुक्कासची सर्वात कमी बोली

जॉय अलुक्कासने एक ग्रॅम सोन्याच्या किमतीव्यतिरिक्त प्रक्रिया शुल्क, विमा, वाहतूक आणि भारतीय मानक ब्युरोच्या (BIS) हॉलमार्किंगसह इतर सर्व अतिरिक्त शुल्कांसाठी केवळ 0.01 रुपयांची सर्वात कमी बोली लावली होती. तमिळनाडूच्या संबंधित निविदा नियमांनुसार कल्याण ज्वेलर्सनेही सर्वात कमी दराची बोली सादर केली. ही योजना 15 सप्टेंबर 2026 रोजी सुरू करण्यात येणार आहे. त्यामुळे जूनपासूनच्या चार महिन्यांतील लाभार्थ्यांना 1 लाख 28 हजार 499 सोन्याच्या अंगठ्या उपलब्ध करून देण्यासाठी दोन्ही कंपन्यांना 70:30 या प्रमाणात कार्यादेश देण्यात आले आहेत. 22 जून 2026 पासून सरकारी रुग्णालयांमध्ये जन्मलेल्या बालकांना या योजनेचा लाभ मिळणार आहे.